Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 229 Hüküm no: 312 Orijinal metin no: [46b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefât eden Yusuf Çavuş’un vârislerinden Mehmed Çelebi’nin sulh bedeli karşılığında terekedeki hakkını sattığı Gıbbe’t-taleb ve’l-iltimâs cânib-i şer‘-i kaviyyü’l-esâsdan mevlânâ Abdulkādir Efendi irsâl olunup ol dahi mahmiye-i İstanbul’da Bezzâz-ı cedîd Mahallesi’nde sâkin fahrü’l-emâsil ve’l-akrân Mehmed Ağa b. Mustafa’nın menziline varıp zeyl-i kitâbda mastûrü’l-esâmî olan Müslimîn huzûrlarında akd eylediği meclis-i şer‘-i şerîfde bundan akdem vefât eden Yusuf Çavuş merhûmun verâseti sulbiye kebîre kızı İsmihan Hatun ile müteveffâ-i mezbûru i‘tâk eden Ca‘fer Bey’in sulbî kebîr oğlu Mehmed Çelebi’ye münhasıra olduğu şer‘an mütehakkık ve muhallefâtının nısfı merkūme İsmihan Hatun’a ve nısf-ı âharı merkūm Mehmed Çelebi’ye isâbet eylediği mütebeyyin oldukdan sonra merkūm Mehmed Çelebi meclis-i mezbûrda mezbûre İsmihan Hatun tarafından husûs-ı âti’z-zikre vekîl olup vekâleti hasm-ı câhid-i şer‘î mahzarında mezbûrenin zâtını ma‘rifet-i şer‘iyye ile ârifân olan Ali Çelebi b. Kasım ve Müezzin Osman Efendi b. Pervane şehâdetleri ile şer‘an sâbite olan zevci işbu bâ‘isü’l-kitâb mezbûr Mehmed Ağa mahzarında ikrâr-ı tâm ve takrîr-i kelâm edip mûrisimiz müteveffâ-i mezbûrun muhallefâtından bana isâbet eden nısf hakkım mukābelesinde vekîl-i mezbûr Mehmed Ağa’dan işbu üç yüz elli kıt‘a riyâlî guruşu bi-tarîkı’s-sulh ahz u kabz edip müteveffâ-i mezbûrun muhallefâtından bana isâbet eden nısf hakkıma müte‘allık cemî‘-i da‘vâ ve mutâlebâtdan müvekkilesi mezbûre İsmihan Hatun’un zimmetini ibrâ-i âmm-ı kātı‘u’n-nizâ‘la ibrâ ve ıskāt eyledim, vechen mine’l-vücûh da‘vâ ve nizâ‘ım kalmadı, ba‘de’l-yevm bir tarîk ile da‘vâ dahi edersem lede’l-hükkâmi’l-kirâm istimâ‘ olunmaya dedikde gıbbe’t-tasdîkı’l-mu‘teber vâki‘ hâli mevlânâ-yı mezbûr mahallinde tahrîr ba‘dehû cânib-i şer‘den ma‘an irsâl olunan İbrahim Çelebi ve Mehmed Çelebi ile gelip herbiri vukū‘u üzere inhâ ve takrîr etmeğin mâ-vaka‘a kaydolundu. Fi’l-yevmi’r-râbi‘ ve’l-ışrîn min-Cumâdelûlâ li-sene erba‘a ve sittin ve elf. Şuhûdü’l-hâl: Hızır Ağa b. Derviş el-müteferrika, Mustafa Ağa b. Pîrî çaşnigîr, Ahmed Efendi halîfe-i rûznâmçe-i küçük, Ömer Ağa b. Mansur kethüdâ-yı ekmekçiyân, İlyas Dede b. Memi kethüdâ, İbrahim Çelebi b. Mustafa el-kâtib ve gayruhum.