Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 230 Hüküm no: 313 Orijinal metin no: [46b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hamza Beşe’nin emaneten verdiği parayı Polos’un iade etmesi gerektiği İşbu râfi‘u’l-kitâb Hamza Beşe b. Ahmed nâm râcil meclis-i şer‘-i hatîr-i lâzımü’t-tevkīrde zimmî tâifesinden Serkis v. Palos muvâcehesinde üzerine da‘vâ ve takrîr-i kelâm edip mezbûr Serkis’e târîh-i kitâbdan üç sene mukaddem emânet vechi üzere yetmiş kıt‘a riyâlî guruş def‘ ve teslîm ol dahi kabz ve tesellüm eyleyip meblağ-ı mezbûru kendi mesârifine sarf ile istihlâk edip ikrâr dahi etmişdir. Hâlâ suâl olunup alıverilmesi matlûbumdur dedikde gıbbe’s-suâl mezbûr Serkis cevâbında müdde‘î-i mezbûr Hamza Beşe’nin bana emânet verip istihlâk ettiğim ancak elli guruşdur deyü yirmi guruşunu inkâr edicek müdde‘î-i mezbûr Hamza Beşe’den da‘vâsına muvâfık beyyine taleb olundukda udûl-i Müslimîn’den <> Ömer Beşe b. Mustafa ve Mustafa b. Hüseyin nâm kimesne li-ecli’ş-şehâde meclis-i şer‘a hâzırân olup isre’l-istişhâd fi’l-hakīka mezbûr Serkis bizim huzûrumuzda <> müdde‘î-i mezbûr Hamza Beşe bana emânet tarîki ile yetmiş riyâlî guruş vaz‘ ve teslîm eyledi, ben dahi zikrolunan yetmiş guruşu tesellüm edip kendi mesârifime sarf ve istihlâk [ettiğini] bizim huzûrumuzda ikrâr u i‘tirâf eyledi, biz bu husûsa şâhidleriz şehâdet dahi ederiz deyü herbiri edâ-yı şehâdet-i şer‘iyye ettiklerinde ba‘de ri‘âyeti’l-şerâiti’l-kabûl hayyiz-i kabûle vusûl bulmağın mûcebince hüküm-birle mâ-vaka‘a bi’t-taleb ketb olundu. Fi’r-râbi‘ ve’l-ışrîn min-Cumâdelûlâ li-sene erba‘a ve sittin ve elf. Şuhûdü’l-hâl: İbrahim b. Davud, Hüseyin b. Mehmed, Mehmed Çelebi b. Hüseyin, Muharrem b. Ali, Mustafa b. Mehmed kapıcı.