Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 231 Hüküm no: 314 Orijinal metin no: [46b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefât etmiş olan Ömer Bey’den alacağı olan el-Hâc Ahmed’in parasının terekeden ödenmesi Mahmiye-i İstanbul’da ketenci tâifesinden işbu sâhibü’l-kitâb el-Hâc Ahmed b. Ali nâm kimesne mahfil-i şer‘-i şerîfde sabıkā bostancıbaşı olan fahrü’l-emâsil ve’l-akrân Ahmed Ağa b. ( ) tarafından husûs-ı âti’z-zikre vekîl-i şer‘îsi olup nehc-i mu‘teber-i mer‘î üzere vekâleti sâbite olan Ahmed Bey b. Mehmed el-Bostanî muvâcehesinde üzerine da‘vâ edip bostâncı tâifesinden olup bilâ-vâris müteveffâ olmağla beytülmâl için tereke-i vâfiyesine mezbûr Ahmed memûr olmağla vaz‘-ı yed eylediği Ömer Bey nâm bostanî zimmetinde yedimden müşterâ ve makbûz her vakıyyesi on sekiz akçeye olmak hesâbınca dokuz yüz vakıyye keten bahâsından on altı bin iki yüz akçe hakkım olup meblağ-ı mezbûrdan on bin akçesini ahz u kabz edip bâkī kalan altı bin iki yüz akçe hakkımı kable’l-istîfâ müteveffâ olmağın zimmetinde kalıp şuhûd mahzarında sıhhat-i hâlinde ikrâr u i‘tirâf dahi eylemiş idi. Hâlâ tereke-i vâfiyesinden taleb ederim, suâl olunsun dedikde gıbbe’l-inkâr ve istişhâd udûl ve sikātdan Mehmed Reis b. Abdi ve Mehmed Çelebi b. Mehmed nâm kimesneler li-ecli’ş-şehâde meclis-i şer‘a hâzırân olup istintak olunduklarında fi’l-hakīka müteveffâ-i mezbûr Ömer Bey bizim huzûrumuzda sıhhati hâlinde müdde‘î-i mezbûra vech-i muharrer üzere keten bahâsından bâkī altı bin iki yüz akçe deynim vardır deyü bizim huzûrumuzda ikrâr u i‘tirâf eyledi biz bu husûsa şâhidleriz şehâdet dahi ederiz deyü herbiri edâ-yı şehâdet-i şer‘iyye eylediklerinde ba‘de ri‘âyeti şerâiti’l-kabûl şehâdetleri hayyiz-i kabûle vusûl bulup [47b] meblağ-ı mezbûrdan küllen ve ba‘zan ahz u kabz veyâ bir tarîkle müteveffâ-i mezbûrun zimmetini ibrâ eylediğine müdde‘î-i mezbûra cânib-i şer‘den yemîn teklîf olunup vefkı’l-mesûl mezbûr dahi half bi’llâhi te‘âlâ etmeğin mûcebiyle tereke-i vâfiye-i müteveffâ-i mezbûrdan meblağ-ı mezbûru îfâya tenbîh-birle mâ-vaka‘a bi’t-taleb sebt ü ketb olundu. Fî-evâhiri Cumâdelûlâ li-sene erba‘a ve sittin ve elf. Şuhûdü’l-hâl: Ali Beşe b. Abdullah çukadâr, Pîrî Bey b. Hüseyin, İbrahim Çelebi b. Davud, Rıdvan b. Abdullah ve gayruhum mine’l-huzzâr.