Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 232 Hüküm no: 316 Orijinal metin no: [47a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İlya v. Abraham’ın Mehmed Beşe’ye borcu olduğu Mahmiye-i İstanbul’da Mercan çarşısı ahâlîsinden işbu bâ‘isü’l-kitâb Mehmed Beşe b. Receb mahfil-i kazâda mahmiye-i merkūmede Sisilya cemâ‘atinden İlya v. Abraham nâm Yahûdi muvâcehesinde üzerine da‘vâ edip mezbûr İlya’nın gāib ani’l-meclis Hasan Beşe nâm kimesne[ye] cihet-i şer‘iyyeden altı bin yedi yüz akçe deyni olmağla bana, ol meblağı sen edâ eyle sana veresin deyü emr etmekle ben dahi mezbûrun emri ile zikrolunan altı bin yedi yüz akçe deynini mezbûr Hasan Beşe’ye edâ edip ba‘dehû mezbûr İlya’ya mürâca‘at eylediğimde ol meblağdan bin sekiz yüz akçesini mezbûr İlya’dan alıp dört bin dokuz yüz akçe bâkī kalmışdı, hâlâ taleb ederiz suâl olunsun dedikde gıbbe’s-suâl mezbûr İlya cevâbında fi’l-vâki‘ meblağ-ı mezbûr dört bin dokuz yüz akçe müdde‘î-i mezbûr Mehmed Beşe’ye vech-i muharrer üzere zimmetimde el-ân lâzımü’l-edâ ve vâcibü’l-kazâ deynimdir deyü bi-tav‘ihi ikrâr u i‘tirâf etmeğin mûcebince meblağ-ı mezbûrun edâsıyla merkūm İlya ilzâm olunup mâ-hüve’l-vâki‘ gıbbe’t-taleb ketb olundu. Fi’l-yevmi’l-hâmis ve’l-ışrîn min-Cumâdelûlâ li-sene erba‘a ve sittin ve elf. Şuhûdü’l-hâl: Hüseyin Beşe b. Mustafa, İbrahim Çelebi b. Davud, el-Hâc Şa‘ban b. Mehmed, Ahmed b. Abdülcebbar.