Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 233 Hüküm no: 317 Orijinal metin no: [47a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Havva Hatun’un evini sattığı Mahmiye-i İstanbul’da Haydarpaşa Mahallesi’nde sâkine Havvâ bt. el-Hâc İbrahim nâm hatun tarafından husûs-ı âti’z-zik[r]i ikrâra vekîl olup vekâleti hasm-ı câhid-i şer‘î mahzarında ma‘rifet-i şer‘ ile ârifân olan Ali Beşe b. Mehmed ve Abdi Çelebi b. Ali Bey şehâdetleri ile şer‘an sâbite olan zevci Usta Ali b. Mahmud mahfil-i kazâda mezbûre Havvâ’nın li-ebeveyn kız karındaşı Fâtıma nâm hatunun zevci ve ikrâr-ı âti’l-beyânı tasdîka vekîl-i sâbitü’l-vekâlesi olan işbu bâ‘isü’l-kitâb Hasan Beşe b. Abdullah mahzarında bi’l-vekâle ikrâr-ı tâm ve takrîr-i kelâm edip mezbûretân Havvâ ve Fâtıma’ya babaları merkūm el-Hâc İbrahim’den intikāl edip mahmiye-i mezbûrede Teberrük Mahallesi’nde vâki‘ bir tarafı mezbûretânın li-ebeveyn kız karındaşları Râbia nâm hatunun mülk-i mevrûsu ve bir tarafı Ebûbekir Efendi’nin zevcesi mülkü ve bir tarafı Abdurrahman Ağa mülkü ve bir tarafı tarîk-i âm ile mahdûd olup birbirine muttasıl iki bâb fevkānî odaları ve muhavvatayı ve bi’r-i mâyı müştemil olan mülk menzilden benim müvekkile-i mezbûre Havvâ ve merkūm Abdurrahman Ağa tarafından olan hisse-i şâyi‘a-i şer‘iyyesini mezbûr Hasan Beşe’nin müvekkilesi mezbûre Fâtıma’ya yirmi dokuz bin yüz râyicü’l-vakt fıddî akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm edip ol dahi minvâl-i muharrer üzere iştirâ ve kabûl ve kabz ve teslîm eylediklerinden sonra semeni olan meblağ-ı mezbûr yirmi dokuz bin akçeyi bi’t-tamam ve’l-kemâl yedinden ahz u kabz eyledi, ba‘de’l-yevm menzil-i mezbûrda müvekkil-i mezbûre Havvâ’nın alâka ve medhali kalmayıp cümlesi mezbûre Fâtıma’nın mülk-i mahzı ve hakk-ı sırfı olmuşdur dedikde vekîl-i mezbûr Usta Ali’nin ber-vech-i meşrûh cârî ve sâdır olan ikrâr ve takrîrini vekîl-i âhar mezbûr Hasan Beşe vicâhen tasdîk ve şifâhen tahkīk eyledikde ma-hüve’l-vâki‘ gıbbe’t-taleb ketb ü sebt olundu. Fi’l-yevmi’r-râbi‘ ve’l-ışrîn min-Cumâdelûlâ li-sene erba‘a ve sittin ve elf. Şuhûdü’l-hâl: Ebûbekir Efendi b. Sultan, Kundakçı Rıdvan Bey, Pir Mehmed Çelebi b. Yavaşça Mehmed Efendi, Derviş Çelebi birâder-i o, Mumcu Mehmed Çelebi, Kasımpaşalı Mehmed Çelebi, Mustafa Beşe Bağdâdlı ve gayruhum mine’l-huzzâr.