Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 233 Hüküm no: 318 Orijinal metin no: [47b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. el-Hâc Süleyman’ın büluğ çağına ermesi sebebiyle babasından kalan parayı vasisinden aldığı Mahmiye-i İstanbul’da Üskübî Mahallesi’nde sâkin olan Âişe bt. el-Hâc Süleyman nâm hatun meclis-i şer‘-i hatîr-i lâzımü’t-tevkīrde tüccâr tâifesinden işbu bâ‘isü’l-kitâb el-Hâc İsa b. İbrahim muvâcehesinde bi’t-tav‘i’s-sâf ikrâr u i‘tirâf edip mezbûr el-Hâc İsa on iki sene mukaddem babam mezbûr el-Hâc Süleyman vefât ettikde kıbel-i şer‘-i şerîfden tesviye-i umûruma vasî nasb ve ta‘yîn olunup babam müteveffâ-i mezbûrdan bana irs-i şer‘le intikāl eden dokuz bin nakd râyic fi’l-vakt akçe hakkımı vesâyeti hasebiyle ahz u kabz etmiş idi. El-hâletü hâzihî ben bâliga olmağın meblağ-ı mezbûru <> vasiyy-i mezbûr yedinden bi’t-tamam ve’l-kemâl ahz u kabz edip meblağ-ı mezbûr dokuz bin akçeden mezbûr el-Hâc İsa zimmetinde bir akçe hakkım bâkī kalmayıp zimmetini ibrâ-i âmm-ı kātı‘u’n-nizâ‘la ibrâ ve ıskāt eyledim dedikde mukırra-i mezbûrenin ber-vech-i muharrer cârî ve sâdır olan ikrâr ve takrîrini el-mukarru lehü’l-mezbûr vicâhen tasdîk ve şifâhen tahkīk etmeğin mâ-hüve’l-vâki‘ gıbbe’t-taleb ketb ü sebt olundu. Fi’l-yevmi’s-sâdis ve’l-ışrîn min-Cumâdelûlâ li-sene erba‘a ve sittin ve elf. Şuhûdü’l-hâl: el-Hâc Ebûbekir b. Ebuzeyd, el-Hâc Ramazan b. Mehmed, el-Hâc Ali b. Salih, el-Hâc Ali b. Bünyad, el-Hâc Cuma b. Mansur ve gayruhum mine’l-huzzâr.