Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 235 Hüküm no: 321 Orijinal metin no: [47b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin Beşe’nin çiftlik, bağ ve tarlalara ait kendi hissesini sattığı Vilâyet-i Rumeli’nde İlbasan kazâsına tâbi‘ Bursik nâm karyeden olup zümre-i râcilînden Hüseyin Beşe b. Timur nâm kimesne meclis-i şer‘-i hatîr-i lâzımü’t-tevkīrde yine karye-i mezbûre sâkinlerinden işbu râfi‘u’l-kitâb diğer Hüseyin Beşe b. Hasan mahzarında ikrâr-ı tâm ve takrîr-i kelâm edip karye-i mezbûrede vâki‘ bir tarafdan Ali mülkü ve bir tarafdan Osman mülkü ve bir tarafdan müşteri-i mezbûr mülkü ve bir tarafdan vâdi ile mahdûd bir bâb tahtânî odayı ve ahırı ve zeytin bağçesini müştemil olan çiflik tâ‘bir olunur menzilin nısf-ı şâyi‘ini ve yine karye-i mezbûrede vâki‘ bir tarafdan Osman bağı ve bir tarafdan Mehmed bağı ve bir tarafdan diğer Mehmed bağı ve bir tarafdan vâdi ile mahdûd iki kıt‘a bağ ile ma‘lûmü’l-hudûd bir bağ yerinin nısf-ı şâyi‘i babam mezbûr Timur’un mülkü ve nısf-ı şâyi‘leri dahi gāib ani’l-meclis âhar Hüseyin nâm kimesnenin mülkü olup babam mezbûr Timur vefât ettikde bi-hasebi’l-irsi’ş-şer‘î bana intikāl etmeğin hâlâ mezbûr diğer Hüseyin’e bi-safkatin vâhidetin iki bin yedi yüz akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ edip ol dahi vech-i muharrer üzere iştirâ ve kabûl eyleyip ve yine karye-i mezbûre sınırı dâhilinde çiflik-i merkūma tâbi‘ lede’l-ahâlî ve’l-cîrân hudûdları beynimizde ma‘lûm olan mevâzi‘-i cedîdede vâki‘ tarlalardan dahi benim mutasarrıf olduğum herbirinin nısf-ı şâyi‘inin hakk-ı tasarruflarını sâhib-i arz ma‘rifetiyle mezbûr Hüseyin’e bin akçe bedel mukābelesinde ferağ ve tefvîz edip ol dahi tefevvüz ve kabûl eyledikden sonra semen-i mezbûr ile bedel-i mezkûrdan müctemi‘ olan üç bin yedi yüz akçeyi mezbûr Hüseyin yedinden tamamen ahz u kabz edip emlâk-i mezbûre mârru’z--zikr olan tarlaları mahallinde zabt ve tasarrufa mezbûr Hüseyin’i taslît eyledim ba‘de’l-yevm emlâk-i mezkûr ile zikrolunan tarlalarda aslâ benim alâka ve medhalim kalmadı keyfe mâ yeşâ’ ve hasbe-mâ yürîd mutasarrıf olsun dedikde gıbbe’t-tasdîk mâ-hüve’l-vâki‘ bi’t-taleb ketb ü sebt olundu. Fi’l-yevmi’s-sâdis ve’l-ışrîn min-Cumâdelûlâ li-sene erba‘a ve sittin ve elf. Şuhûdü’l-hâl: Ali Beşe b. Ahmed, Hüseyin Beşe b. Hasan, Ali Beşe b. Yusuf ve gayruhum.