Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 235 Hüküm no: 322 Orijinal metin no: [48a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahtar v. David’in evini borcuna karşılık rehin olarak verdiği Mahmiye-i İstanbul’da Sulumanastır nâm mahalle sâkinlerinden Ahtar v. David nâm Ermeni meclis-i şer‘-i hatîr-i lâzımü’t-tevkīrde mahmiye-i mezbûrede Alaman cemâ‘atinden bâ‘isü’r-rakīm Efrayim v. Bozdahay nâm Yahûdi muvâcehesinde ikrâr-ı tâm ve takrîr-i kelâm edip mezbûr Mosi ile târîh-i kitâba gelince beynimizde cârî olan mu‘âmelât-ı şer‘iyyeden ba‘de külli hesâb zimmetimde sekiz yüz kıt‘a riyâlî guruş lâzımü’l-kazâ ve vâcibü’l-edâ deynim zuhûr etmek ile zikrolunan sekiz yüz guruş deynim mukābelesinde mahalle-i mezbûrede vâki‘ bir tarafdan Derviş Ağa mülkü ve bir tarafdan Bakey nâm zimmî mülkü ve tarafeynden tarîk-i âm ile mahdûd olup dört bâb fevkānî ve üç bâb tahtânî büyûtu ve sofayı ve bi’r-i mâ [ve] hadîka-i eşcâr-ı müsmire ve gayr-ı müsmire ve dört aded kumaş kârhânesini müştemil olan mülk menzilimi mezbûr Efrayim’e rehin vaz‘ edip ba‘de’t-tahliyye teslîm eyledim ol dahi menzil-i mezbûr[u] meblağ-ı mezbûr sekiz yüz riyâlî guruş mukābelesinde irtihân ve kabûl ve kabz ve tesellüm eyledi dedikde gıbbe’t-tasdîk mâ-hüve’l-vâki‘ gıbbe’t-taleb ketb ü sebt olundu. Fi’l-yevmi’s-sâbi‘ ve’l-ışrîn min-Cumâdelûlâ li-sene erba‘a ve sittin ve elf. Şuhûdü’l-hâl: İbrahim Çelebi b. Davud, Ramazan b. Abdullah, Pîrî Beşe b. Hüseyin, Muharrem b. Abdullah, el-Hâc Şa‘ban b. Mehmed ve gayruhum.