Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 236 Hüküm no: 323 Orijinal metin no: [48a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Reis’in evini damadına sattığı Galata kazâsı muzâfâtından kasaba-i Kasımpaşa’da el-Hâc Hüsrev Mahallesi’nde sâkin Mehmed Reis b. Hüseyin mahfil-i kazâda dâmâdı işbu hâmilü’l-kitâb Himmet Beşe b. Murad mahzarında ikrâr-ı tâm ve takrîr-i kelâm edip silk-i mülkümde muntazam olup mahalle-i mezbûrede bir tarafı Kasab Receb mülkü ve bir tarafı Na‘lçacı Mustafa mülkü ve bir tarafı Kiçi Kara Hasan mülkü ve bir tarafı tarîk-i âm ile mahdûd bir bâb fevkānî ve bir bâb tahtânî odaları ve tahta-pûşu muhavvata-i zât-ı eşcâr-ı müsmireyi müştemil mülk menzilimi cümle tevâbi‘ ve levâhıkı ve kâffe-i menâfi‘ ve levâhık ile dâmâdım mezbûr Himmet Beşe’ye on beş bin nakd râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm edip ol dahi menzil-i mezbûru minvâl-i muharrer üzere iştirâ ve kabûl ve kabz ve tesellüm eyledikden sonra semeni olan meblağ-ı mezbûr on beş bin akçeyi bi’t-tamam ve’l-kemâl ahz u kabz eyledim, ba‘de’l-yevm menzil-i mezbûrda benim alâka ve medhalim kalmayıp dâmâdım mezbûr Himmet Beşe’nin mülk-i müşterâsı olmuşdur, keyfe mâ yeşâ’ ve yehtâr mutasarrıf olsun dedikde mukırr-ı mezbûr Mehmed Reis ikrâr-ı meşrûhunda el-mukarru lehü’l-merkūm Himmet vicâhen tasdîk şifâhen tahkīk etmeğin gıbbe’t-taleb ketb ü sebt olundu. Fi’s-sâdis ve’l-ışrîn min-Cumâdelûlâ li-sene erba‘a ve sittin ve elf. Şuhûdü’l-hâl: İbrahim Beşe sarrac-ı sultânî, Mehmed Beşe es-sarrac-ı sultânî, Musa Beşe es-sarrac-ı sultânî, Ali Beşe, Rıdvan b. Abdullah ve gayruhum.