Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 237 Hüküm no: 325 Orijinal metin no: [48a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Babasının ölümüne sebep olana oğlu Yusuf’un açtığı diyet davasının sulh ile sonuçlandığı Yusuf b. Eymür nâm kimesne mahfil-i kazâda sefîne reislerinden işbu hâmilü’s-sifr Senadine v. Peraşkeve nâm zimmî muvâcehesinde ikrâr-ı tâm ve takrîr-i kelâm edip târîh-i kitâbdan yirmi gün mukaddem babam mezbûr Eymür Dil nâm mevzi‘de kayığa binip karşıya geçerken mezbûr Senadine reis sefînesi ile İstanbul’dan gelip İznikmid’e giderken ol kayığı basdırıp babam mezbûr Eymür deryâya gark olup fevt olmuş idi, ol hînde mezbûr Senadine reis sefînenin men‘ine kādir iken men‘ etmeyip müsâmaha etmekle diyetini mezbûr Senadine reisden da‘vâ sadedinde idim. El-hâletü hâzihî tevassut-ı Müslimîn ile mezbûr Senadine reisden bi-tarîkı’s-sulh beş yüz nakd râyic fi’l-vakt fıddî-i Osmânî akçe ahz u kabz ve ol da‘vâdan fâriğ olup zimmetini ibrâ-i âmm-ı kātı‘u’n-nizâ‘ ile ibrâ ve ıskāt eyledim mezbûr Senadine ile husûs-ı mezbûra müte‘allik vechen mine’l-vücûh da‘vâ ve nizâ‘ım kalmadı, ba‘de’l-yevm bir tarîkle da‘vâ dahi edersem lede’l-hükkâmi’l-kirâm istimâ‘ olunmaya dedikde gıbbe’t-tasdîk ve’t-taleb mâ-vaka‘a ketb ü sebt olundu. Fi’l-yevmi’s-sâbi‘ ve’l-ışrîn min-Cumâdelûlâ li-sene erba‘a ve sittin ve elf. Şuhûdü’l-hâl: Mehmed Efendi b. Abdüllatif, Mehmed Beşe b. Ebîbekir, Mehmed Beşe b. Mahmud, Ahmed b. Ali, Davud Beşe b. Şa‘ban, Mustafa Beşe b. Mahmud, Osman Beşe b. Mehmed, Ramazan b. Yusuf.