Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 239 Hüküm no: 328 Orijinal metin no: [48b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefât eden Abdullah Ağa’dan kızı Sâliha’ya kalan dükkânı kiralayan Yani beş aydır ortada olmadığından dükkânı açılarak içerde hiçbir eşya olmadığının tesbit edildiği Mahmiye-i İstanbul’da Nallımescid Mahallesi’nde sâkin iken bundan akdem vefât eden merhûm Abdullah Ağa b. Rıdvan Ağa’nın li-ebeveyn karındaşı ve sulbiye sagīre kızı Sâliha’nın tesviye-i umûruna kıbel-i şer‘den mansûb vasîsi olan işbu râfi‘u’l-kitâb Abdurrahman Ağa -zîde kadruhu- tarafından Mehmed Beşe b. Abdullah mahfil-i kazâya gelip takrîr-i kelâm ve tavzîh murâd edip Ayasofya-i kebîr Evkāfı’ndan icâre-i mu‘accele ve müeccele ile sagīre-i mezbûrenin tasarrufunda olan Sipâhî çarşısında Yolgeçen odaları kurbünde vâki‘ terzi dükkânını vasîsi mezbûr Abdurrahman Ağa Yani nâm zimmîye ayda yüz akçe ücret-i müeccele ile îcâr ve teslîm ol dahi istîcâr ve tesellüm eylemiş idi. Hâlâ mezbûr Yani beş aydan berü gāib olup ve zikrolunan dükkânın icâresin vermeğe tarafından bir vekîli dahi olmayıp ile’l-ân kilidi altında olmağla sagīre-i mezbûre ve cânib-i vakfa gadr olmağın cânib-i şer‘den varılıp, açılıp gāib-i mezbûrun içinde olan eşyâsı tahrîr ve bir emîn kimesneye emânet vaz‘ olunmak iltimâs eder dedikde cânib-i şer‘den mevlânâ Kadri Efendi irsâl olunup ol dahi zeyl-i kitâbda mastûrü’l-esâmî olan Müslimîn ile varıp ol dükkânı açdıklarında mezbûr Yani’nin bir çakmaklı tüfenk gılâfından gayrı içinde ism-i mâl ıtlâk olunur bir şey olmamağla vâki‘ hâli mevlânâ-yı mezbûr mahallinde tahrîr ba‘dehû gelip meclis-i şer‘de inhâ ve takrîr etmeğin mâ-vaka‘a gıbbe’t-taleb ketb ü sebt olundu. Fî-gurreti Cemâziyelâhire li-sene erba‘a ve sittin ve elf. Şuhûdü’l-hâl: Ömer Çelebi b. Abdullah, Mehmed Bey b. Receb, Mehmed b. Abdullah, Mehmed Beşe b. Abdullah, Rıdvan b. Abdullah ve gayruhum.