Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 240 Hüküm no: 331 Orijinal metin no: [49a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Efendi’nin ev ve tarlalardaki hissesini Ali Efendi b. Mustafa’ya sattığı Vilâyet-i Anadolu’da Kastamonu sancağında Taşköprü kazâsına tâbi‘ Kozluca <> nâm karye ahâlîsinden olup bundan akdem vefât eden Sadullah Efendi b. Ahmed’in verâseti sulbî kebîr oğulları Ali Efendi ve Abdülfettâh Çelebi ve Abdullah Çelebi nâm kimesnelere münhasıra olduğu şer‘an sâbit ve mütehakkık oldukdan sonra mezbûr Ali Efendi meclis-i şer‘-i hatîr-i lâzımü’t-tevkīrde işbu sâhibü’l-kitâb diğer Ali Efendi b. Mustafa mahzarında ikrâr-ı tâm ve takrîr-i kelâm edip babamız müteveffâ-i mezbûrdan bi-hasebi’l-irs-i şer‘î bize intikāl edip karye-i mezbûrede ve yine kazâ-i mezbûra tâbi‘ el-Hâc Hasanlı nâm karyede vâki‘ lede’l-ahâlî ve’l-cîrân ma‘lûmü’l-hudûd olan mülk menzil bedelinden sülüs hisse-i şâyi‘alarımı mezbûr diğer Ali Efendi’ye bin nakd râyicü’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ edip ol dahi iştirâ ve kabûl eyleyip ve yine zikrolunan Kozluca ile Hacı Hasanlı karyelerinde vâki‘ lede’l-ahâlî ve’l-cîrân ma‘lûmü’l-hudûd olup mevâzi‘-i adîdede vâki‘ tarlalarda ve eşcâr-ı müsmire ve gayr-ı müsmirede olan sülüs hisse-i şâyi‘alarımın dahi hakk-ı tasarruflarını sâhib-i arz ma‘rifetiyle mezbûr diğer Ali Efendi’ye mezbûru’n-na‘t iki bin akçe bedel mukābelesinde ferağ ve tefvîz edip ol dahi tefevvüz ve kabûl eyledikden sonra semen-i mezbûr ile bedel-i merkūmdan müctemi‘ olan üç bin akçeyi mezbûr diğer Ali Efendi yedinden bi’t-tamam ve’l-kemâl ahz u kabz edip zikrolunan sülüs hisse-i şâyi‘alarımı mahallinde kabz ve tesellüme ve zabt ve tasarrufa mezbûr diğer Ali Efendi’yi taslît eyledim dedikde mukırr-ı mezbûrı ikrâr-ı meşrûhunda el-mukarru lehü’l-mezbûr diğer Ali Efendi vicâhen tasdîk ve şifâhen tahkīk etmeğin mâ-hüve’l-vâki‘ bi’t-taleb ketb ü sebt olundu. Fi’l-yevmi’s-sânî min-Cemâziyelâhire li-sene erba‘a ve sittin ve elf. Şuhûdü’l-hâl: Fahrü’l-kuzât Abdulkādir Efendi b. Mustafa Efendi, Mustafa Efendi b. Mehmed Efendi, Mustafa Efendi b. Ali Efendi, Fahrü’l-müderrisîn Mehmed Efendi ve gayruhum.