Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 241 Hüküm no: 332 Orijinal metin no: [49a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kostantin v. Manolaki’nin bir sene içinde Mehmed Bey’e belli miktarda odunu teslim edeceği Mahrûse-i Galata kazâsı muzâfâtından Marmara nâhiyesine tâbi‘ Perastos nâm karye ahâlîsinden Kostantin v. Manolaki nâm zimmî mahfil-i şer‘-i şerîfde işbu sâhibü’l-kitâb Mehmed Bey b. Abdullah el-yesârî muvâcehesinde ikrâr-ı tâm ve takrîr-i kelâm edip mezbûr Mehmed Bey’e târîh-i kitâbdan yüz yirmi gün tamamında mahmiye-i İstanbul’da her çekisi otuzar akçe olmak hesâbınca üç yüz otuz üç çeki ile bir kantar marmara odunu teslîm eylemek için akd-i silm-i şer‘î edip meclis-i akidde mezbûr Mehmed Bey yedinden re’s-i mâl olan on bin akçeyi ahz u kabz eylemişdir dedikde gıbbe’t-tasdîkı’ş-şer‘î mezbûr Kostantın’in nefsine ve gaybet ederse zimmetine lâzım gelen meblağa oğlu Manolaki nâm zimmî emriyle kefîl olmağın mâ-vaka‘a gıbbe’t-taleb ketb olundu. Tahrîren fi’l-yevmi’s-sânî min-Cemâziyelâhire li-sene erba‘a ve sittin ve elf. Şuhûdü’l-hâl: Receb Beşe el-bostânî, Mehmed Beşe b. ( ), İbrahim Çelebi b. Davud, Pîrî Beşe b. Hüseyin ve gayruhum.