Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 242 Hüküm no: 333 Orijinal metin no: [49a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hatun’un bağını sattığı Mahmiye-i İstanbul’da Hoca Üveys Mahallesi’nde sâkin olup ikrâr-ı âti’z-zikre kendi tarafından asîl ve li-ebeveyn kız karındaşı Âişe Hatun tarafından vekîl ma‘rifet-i şer‘iyye ile mezbûreyi ârifân olan Muharrem Çelebi b. Musa ve Murtaza Bey b. Mustafa nâm kimesneler şehâdetleriyle vekâleti sâbite olan Abdurrahman b. Mustafa mahfil-i şer‘-i şerîfde işbu sâhibü’l-kitâb Zülfikār Usta b. Abdullah mahzarında asâleten [ve] vekâleten ikrâr u i‘tirâf edip Yoros kazâsına tâbi‘ Kan[lı]ca nâm kasaba kurbünde Kemer nâm mevzi‘de vâki‘ bir tarafdan merhûm Bahâyî Efendi veresesi mülkleri ve bir tarafdan Hızır Baba mülkü ve bir tarafdan Attâr Ali Çelebi mülkü ve bir tarafdan tarîk-i hâs ile mahdûd [ve] mümtâz mülk-i mevrûsum olan bir kıt‘a bağımı mezbûr Hasan Usta’ya bey‘-i kat‘î ile iki bin beş yüz akçeye asâleten [ve] vekâletim hasebiyle bey‘ ve teslîm ol dahi vech-i muharrer üzere iştirâ ve kabz ve tesellüm eyledikden sonra semen-i mezbûreyi yedinden bi’t-tamam ahz u kabz eyleyip zikrolunan bağ mülk-i müşterâsı olmuşdur, hasbe-mâ yürîd mutasarrıf olsun dedikde gıbbe’t-tasdîk mâ-vaka‘a bi’t-taleb ketb ü sebt olundu. Fi’s-sânî min-Cemâziyelâhire sene erba‘a ve sittin ve elf. Şuhûdü’l-hâl: Pîrî Beşe b. Hüseyin, Ali Beşe b. Abdullah, Kara İbrahim b. Davud, Rıdvan Beşe b. Abdullah ve gayruhum.