Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 242 Hüküm no: 334 Orijinal metin no: [49b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali b. Hüseyin’in pirinç bahasından Mehmed Beşe’ye vermesi gereken parayı ödemesi İşbu bâ‘isü’l-kitâb Mehmed Beşe b. Kaplan nâm <> râcil meclis-i şer‘-i hatîr-i lâzımü’t-tevkīrde tüccâr tâifesinden Ali b. Hüseyin nâm kimesne mahzarında üzerine da‘vâ ve takrîr-i kelâm edip mezbûr Ali’yi bundan akdem mikdârı beynimizde ma‘lûm bir kaç keyl pirinç bana satıvermek için tevkîl ve yedine def‘ ve teslîm edip ol dahi ahz u kabz ve tesellüm eyledikden sonra bey‘ etmeğin semeninden zimmetinde bin altı yüz akçe hakkım bâkī kalmışdır, suâl olunup alıverilmesi matlûbumdur dedikde gıbbe’s-suâl mezbûr Ali cevâbında fi’l-vâki‘ müdde‘î-i mezbûr ile şerîki olup gāib ani’l-meclis Halil Beşe’ye vech-i muharrer üzere pirinç bahâsından bin altı yüz akçe zimmetimde bâkī kalmışdır, lâkin meblağ-ı mezbûrun ancak sekiz yüz akçesi mezbûr Mehmed Beşe’nin ve sekiz yüz akçesini dahi gāib-i merkūm Halil Beşe’nindir deyü cevâb edicek mezbûr Mehmed Beşe’den iddi‘â eylediği meblağ cümlesi kendinin hakkı olduğunu beyyine taleb olundukda ityân-ı beyyineden ızhâr-ı acz ile istihlâf etmeğin fi’l-hakīka mezbûr Ali’ye meblağ-ı merkūm bin altı yüz akçenin cümlesi müdde‘î-i mezbûr Mehmed Beşe’nin hakkı olmadığına yemîn teklîf olundukda merkūm Ali yemînden nükûl etmeğin mûcebince meblağ-ı mezbûr bin altı yüz akçeyi müdde‘î-i mezbûr Mehmed Beşe’ye edâ ve teslîme merkūm Ali’ye tenbîh-birle mâ-vaka‘a bi’t-taleb ketb ü sebt olundu. Fi’l-yevmi’s-sânî min-Cemâziyelâhire li-sene erba‘a ve sittî ve elf. Şuhûdü’l-hâl: İbrahim Çelebi b. Davud, Hüseyin b. Mehmed, Muharrem b. Hüseyin, el-Hâc Şa‘ban b. Mehmed ve gayruhum mine’l-huzzâr.