Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 244 Hüküm no: 337 Orijinal metin no: [49b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rahime Hatun’un dükkânını sattığı Muhadderâtdan olup meclis-i şer‘a huzûru ma‘kūd olan Rahime Hatun bt. Hasan Ağa’nın mahallinde bi-nefsihâ ikrârı tescîl olunması iltimâs olunmağın cânib-i şer‘-i şerîfden mevlânâ Ali Efendi irsâl olunup ol dahi zeyl-i kitâbda mastûrü’l-esâmî olan Müslimîn ile mahmiye-i mezbûrede Yavuzer Mahallesi’nde sâkin Mahmud Çelebi b. Ramazan nâm kimesnenin menziline varıp akd-i meclis-i şer‘-i şerîf olundukda mezkûre Rahime Hatun meclis-i mezbûra hâzıra olup mahremi olan el-Hâc Ahmed Çelebi b. Ramazan nâm kimesne ile Bihruz bt. Abdullah ve Tenzile bt. Şükür nâm hatunlar merkūme Rahime’ye müşîre olup bi-nefsihâ ikrârı tescîl olunmak iltimâs olunan Rahime Hatun bt. Hasan Ağa bu hatundur deyü mezbûrların ta‘rîfleri ile mu‘arrefe oldukdan sonra mezbûre Rahime meclis-i mezbûrda el-Hâc Veli Hüseyin tarafından ikrâr-ı âti’l-beyânı tasdîka sulbî oğlu vekîl olup vekâleti bi mâ-hüve nehci’s-sübût sâbite olan bâ‘isü’l-kitâb Receb Çelebi b. el-Hâc Veli [50a] mahzarında ikrâr-ı tâm ve takrîr-i kelâm edip mahmiye-i mezbûrede Odunkapısı hâricinde vâki‘ bir tarafdan Mi‘mâr Mustafa Ağa b. Abdullah dükkânı ve bir tarafdan İbrahim Ağa b. ( ) nâm kimesne dükkânı ve bir tarafdan sâhil-i bahr ve bir tarafdan tarîk-i âm ile mahdûd Haseki Sultan Vakfı’ndan olup icâre-i mu‘accele ve müeccele ile zabt ve tasarrufumda olan bir bâb keresteci dükkânı müvekkil-i mezbûr el-Hâc Veli’ye izn-i mütevellî ile yedi yüz riyâlî guruş-ı kebîre ferağ ve tefvîz edip ol dahi tefevvüz ve kabûl ettikden sonra bedel-i ferağ olan meblağ-ı mezbûr yedi yüz guruşu müvekkil-i mezbûr el-Hâc Veli yedinden bi’t-tamam ve’l-kemâl alıp kabz eyledim, ba‘de’l-yevm mârru’z--zikr dükkânı mezbûr Hacı Veli keyfe mâ yeşâ’ ve yehtâr mutasarrıf olsun dedikde mukırra-i mezbûreyi ikrâr-ı meşrûhunda el-mukarru lehü’l-merkūm Receb Çelebi vicâhen tasdîk ve şifâhen tahkīk ettiğini mevlânâ-yı mezbûr mahallinde tahrîr ba‘dehû meclis-i şer‘a gelip alâ-vukū‘ihî inhâ etmeğin mâ-hüve’l-vâki‘ alâ-vukū‘ihî bi’t-taleb ketb olundu. Tahrîren fi’l-yevmi’s-sânî min-Cemâziyelâhire li-sene erba‘a ve sittin ve elf. Şuhûdü’l-hâl: Abdüllatif Efendi el-müderris, Halil Ağa b. Receb, Mustafa Çelebi b. Süleyman, Mehmed Çelebi b. Süleyman, Sefer Bey b. Abdullah, Mehmed Bey b. ( ) el-cündî, Kasım Beşe b. Abdullah, Ca‘fer Beşe b. Halil, Derviş Mehmed b. Mehmed, Mustafa b. Hüseyin, Hüseyin b. Osman ve gayruhum mine’l-huzzâr.