Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 244 Hüküm no: 338 Orijinal metin no: [50a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefât eden Receb’in çocuklarına vasi tayin edildiği Hâssa bostancılar oturağı olup mahmiye-i İstanbul’da Ekserci Solak Mahallesi’nde sâkin iken bundan akdem vefât eden merhûm Receb Bey b. Ahmed’in sulbî oğulları Ahmed ve Mehmed ve Mustafa nâm sagīrlerin emvâllerin hıfza ve babaları müteveffâ-i merkūmdan intikāl eden malların zabta vesâir tesviye-i umûrlarına bir vasî nasb olunmak lâzım ve mühim olmağın işbu râfi‘u’l-kitâb el-Hâc Mehmed Bey b. Osman salâh ile mevsûf ve istikāmet ile ma‘rûf olup vesâyete ehil olmağla hâkim-i muvakki‘ sadr-ı kitâb tûbâ-lehû ve hüsnü-meâb hazretleri mezbûr el-Hâc Mehmed Bey’i sıgār-ı mezbûrîne vasî nasbedip ol dahi vesâyet-i merkūmeyi kabûl ve merâsimini edâya müte‘ahhid olmağın mâ-vaka‘a gıbbe’t-taleb ketb ü sebt olundu. Fi’l-yevmi’s-sâdis min-Cemâziyelâhire li-sene erba‘a ve sittin ve elf. Şuhûdü’l-hâl: Mehmed Dede b. Hüseyin, Himmet Beşe b. Ahmed, Yusuf Beşe b. Kulu, Abdünnebi Beşe b. Habib, Şükrullah Beşe b. Musa, İbrahim Çelebi b. Davud ve gayruhum.