Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 245 Hüküm no: 340 Orijinal metin no: [50a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hadice Sultan’ın evini sattığı Dürretü iklîli’l-ismet ve izzetü cibîni’l-iffet Hadice Sultan hazretlerinin kethüdâlıkları hizmetinde olan fahrü’l-muhadderât Huri Hatun bt. Abdullah tarafından husûs-ı âti’z-zikri ikrâra vekîl olup vekâleti müvekkile-i müşârun-ileyhâyı ma‘rifet-i şer‘iyye ile ârifân olan Osman Çelebi b. Ramazan ve Mehmed Çelebi b. Ahmed şehâdetleriyle sâbite olan fahrü’l-emâsil ve’l-a‘yân Mehmed Kapudan b. Murad Paşa meclis-i şer‘-i hatîr-i lâzımü’t-tevkīrde işbu râfi‘u’l-kitâb Mustafa b. Mehmed muvâcehesinde bi’l-vekâle ikrâr-ı tâm ve takrîr-i kelâm edip müvekkile-i müşârun-ileyhânın silk-i mülklerinde muntazam olup medîne-i Üsküdar’da Mahmud Mahallesi’nde vâki‘ bir tarafdan Ramazan b. Abdülmennan mülkü ve bir tarafdan Kayıkçı Mehmed mülkü ve bir tarafdan Mehmed Çelebi b. Abdülmennan mülkü ve bir tarafdan tarîk-i âm ile mahdûd bir bâb fevkānî ve dört bâb tahtânî büyûtu ve bi’r-i mâ ve kenîfi ve hadîka-i eşcâr-ı müsmire[yi] müştemil olan mülk menzilini müvekkile-i mûmâ-ileyhimâ tarafeynden îcâb ve kabûlü hâvî bey‘-i bâtt-ı sahîh-i şer‘î ile mezbûr Mustafa’ya yüz elli kıt‘a riyâlî guruşa safka-i vâhide ile bey‘ ve teslîm ol dahi iştirâ ve tesellüm eyledikden sonra semeni olan meblağ-ı mezkûr yüz elli riyâlî guruşu mezbûr Mustafa’nın yedinden tamamen ahz u kabz edip zikr olunan menzilde müvekkile-i müşârun-ileyhânın alâka ve medhali kalmayıp müşterâ-yı mezbûr Mustafa’nın mülk-i mahzı olmuşdur, keyfe mâ yeşâ’ ve hasbe-mâ yürîd mutasarrıf olsun dedikde vekîl-i mezbûr Mehmed Kapudanın vech-i muharrer üzere cârî ve sâdır olan ikrâr ve takrîrini el-mukırru lehü’l-mezbûr vicâhen tasdîk ve şifâhen tahkīk etmeğin mâ-hüve’l-vâki‘ bi’t-taleb ketb olundu. Fi’l-yevmi’l-hâmis min-Cemâziyelâhire li-sene erba‘a ve sittin ve elf. Şuhûdü’l-hâl: İbrahim Efendi el-imâm, el-Hâc Mehmed odabaşı, Mehmed Çelebi b. Ahmed, Osman Bey el-cündî, Nasuh b. Abdullah, Hasan bölükbaşı, Süleyman Beşe ve gayruhum.