Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 246 Hüküm no: 342 Orijinal metin no: [50b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed’in kızları Neslihan ve İsmihan’ın evlerini sattıkları Mahmiye-i İstanbul’da Âşıkpaşa Mahallesi’nde sâkine İsmihan ve Neslihan bintey Mehmed nâm hatunlar meclis-i şer‘-i hatîr-i lâzımü’t-tevkīrde işbu sâhibü’l-kitâb Ebûbekir b. Abdullah mahzarında herbiri ikrâr ve takrîr-i kelâm edip babamız müteveffâ-i mezbûrdan bize intikāl edip ve Galata kazâsına tâbi‘ İstinye nâm karyede vâki‘ bir tarafdan Rıdvan Beşe mülkü ve etrâf-ı selâsesi tarîk-i âm ile mahdûd bir bâb fevkānî ve bir bâb tahtânî odaları ve sofayı ve bi’r-i mâ ve fırını ve eşcâr-ı müsmire ve gayr-ı müsmireyi muhtevî muhavvatayı müştemil mülk menzilimi on iki bin fıddî râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile mezbûr Ebûbekir’e bey‘ ve teslîm edip ol dahi minvâl-i muharrer üzere iştirâ ve kabûl eyledikden sonra semen-i mezbûr on iki bin akçeyi müşteri-i mezbûr yedinden bi’t-tamam ve’l-kemâl ahz u kabz eyledik, ba‘de’l-yevm zikrolunan menzil-i mezbûr Ebûbekir’in mülk-i müşterâsı ve hakk-ı sırfı olmuşdur, keyfe mâ yeşâ’ ve hasbe-mâ yürîd mutasarrıf olsun dedikde gıbbe’t-tasdîkı’ş-şer‘î mâ-hüve’l-vâki‘ gıbbe’t-taleb ketb ü sebt olundu. Fi’l-yevmi’l-hâmis min-Cemâziyelâhire li-sene erba‘a ve sittin ve elf. Şuhûdü’l-hâl: İbrahim Çelebi el-yesârî, Himmet Beşe b. Ahmed, el-Hâc Mehmed b. el-Hâc Himmet, el-Hâc Himmet b. Mehmed, Mehmed b. Hüseyin, Hasan Beşe b. Şa‘ban, Halil Beşe b. Yusuf ve gayruhum.