Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 247 Hüküm no: 343 Orijinal metin no: [50b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rahime ve Sâliha’ya babalarından kalan malların tamamının vasileri olan annelerinin elinde olduğu Üsküdar muzâfâtından Karamürsel’de Yalı Mahallesi’nde sâkin iken bundan akdem vefât eden İbrahim Yazıcı b. el-Hâc Mustafa’nın verâseti zevce-i metrûkesi Fâtıma bt. el-Hâc Ahmed’e ve sulbiye <> sagīre kızları Rahime ve Sâliha’ya ve li-ebeveyn er karındaşı el-Hâc Hüseyin ve li-ebeveyn kız karındaşı Kamer Hatun’a münhasıra olduğu şer‘an müte‘ayyen oldukdan sonra merkūm Fâtıma sagīretân-ı mezbûretânın tesviye-i umûrları için kıbel-i şer‘den mansûbe vasîleri olmağın vesâyeten mahfil-i kazâda yine mahalle-i mezbûrede sâkin olup fevt olan mezbûr el-Hâc Hüseyin’in zevce-i metrûkesi ve sulbî oğlu Mehmed ve sulbiye kızları Âişe ve Fâtıma ve Hadice nâm sagīrelerin dahi tesviye-i umûrlarına cânib-i şer‘den mansûbe vasîleri olan sıgār-ı mezbûrînin vâlideleri işbu bâ‘isetü’l-kitâb Emine bt. Mustafa nâm hatun mahzarında ikrâr-ı tâm ve takrîr-i kelâm edip müteveffâ-i mezbûr el-Hâc Hüseyin hâlâ benim vasîleri olduğum sadriye kızların sagīretân-ı mezbûretân Rahime ve Sâliha’nın li-ebeveyn ammeteleri olup mukaddemâ tesviye-i umûrlarına kezâlik cânib-i şer‘den mansûb vasîleri olmağla babaları müteveffâ-i merkūmun muhallefâtından yedimde olan mümzâ ve mahtûm kassâm defteri mûcebince sagīretân-ı mezbûretâna intikāl eden mahalle-i mezbûrede vâki‘ kırk sekiz bin akçe kıymetli menzili ve menzil-i mezbûre kurbünde vâki‘ on altı bin akçe kıymetli bağçeyi ve kasaba-i mezbûrede vâki‘ lede’l-ahâlî el-Hâc Ahmed bağı demekle ma‘rûf yirmi bin akçe kıymetli ma‘lûmü’l-hudûd bağı ve her biri ma‘lûmumuz olup hâlâ mevcûd olan on bin akçe kıymetli esâs-ı beyti ve el-ân der-kîse olup sagīretân-ı mezbûretân için müstakil mahfûz olan yirmi üç bin altı yüz altmış nakid akçeyi ki cem‘an yüz on yedi bin altı yüz altmış dört akçe olmak üzere müteveffâ-i mezbûr el-Hâc Hüseyin hâl-i sıhhatinde vesâyeti hasebiyle kabz eylemişdi. Hâlâ fevt olup sagīretân-ı mezbûretâna ben vasî olmağla der-kîse olan meblağ-ı mezbûr yirmi üç bin altı yüz altmış dört akçe ve akārât-ı mezkûre ve zikrolunan esâs-ı beyt mezbûre Emine yedinde kāim olmağın bi-cümletihâ vesâyetim hasebiyle ber-mûceb-i defter-i kassâm ben ahz u kabz eyledim ve yine müteveffâ-i mezbûr İbrahim Yazıcı’nın hâric ez-defter olan muhallefâtından Kapıdağı nâhiyesinde Batalık nâm karyede zimem-i nâsda olan nukūddan bi-hasebi’l-irsi’ş-şer‘î sagīretân-ı mezbûretâna isâbet edip müteveffâ-i mezbûr el-Hâc Hüseyin’in hâl-i hayâtında yine vesâyeti hasebiyle makbûzu olup hâlâ der-kîse olmağile mevcûd olan yirmi sekiz bin üç yüz otuz altı akçeyi dahi ben vesâyetim hasebiyle ahz u kabz eyleyip sagīretân-ı mezbûretânın dâhil-i defter olan ve hâric ez-defter olan cem‘an yüz kırk altı bin akçe haklarından seksen dört bin akçe kıymetli akārât-ı mezkûre ve on bin akçe kıymetli esâs-ı beyt ve elli iki bin nakid akçe vesâyetim hasebiyle hâlâ benim makbûzum olup sagīretânın merkūme Emine yedinde bir akçe ve bir habbe hakkı kalmadı dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb ü sebt olundu. Tahrîren fi’l-yevmi’s-sâdis min-Cemâziyelâhire li-sene erba‘a ve sittin ve elf. Şuhûdü’l-hâl: es-Seyyid Abdulkādir Efendi b. Hüseyin, el-Hâc Mehmed b. Beşir Beşe, el-Hâc İbrahim b. Halil, Ali Çelebi b. Mustafa, İbrahim Beşe b. Durmuş, el-Hâc Mehmed Halîfe b. Hüseyin el-imâm, Muslı Beşe b. Mustafa, el-Hâc Mehmed b. Ali, Mehmed Yazıcı b. Himmet, Mehmed b. el-Hâc İbrahim, İbrahim Efendi b. Mustafa, Ömer Beşe b. el-Hâc Hüseyin, Hüseyin b. el-Hâc Hasan, Hüsrev b. Hızır, el-Hâc Mehmed b. Fazlullah, Mehmed Çelebi b. Ahmed, Şa‘ban b. Hüseyin, Ali Beşe b. Abdullah çukadâr, İbrahim Çelebi b. Davud er-ressâm, Pîrî Beşe b. Hüseyin kāimmakām, Halil Beşe b. Lütfullah ve gayruhum mine’l-huzzâr.