Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 248 Hüküm no: 344 Orijinal metin no: [51a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sunullah Efendi b. Osman’ın kölesini azat ettiği Medîne-i İzmir kazâsına tâbi‘ kasaba-i Urla ahâlîsinden olup zümre-i kudâtdan olan Sunullah Efendi b. Osman tarafından husûs-ı âti’z-zikre vekîl olup Ahmed b. Hasan ve Mustafa b. Mehmed nâm kimesneler şehâdetleriyle vekâleti sâbite olan li-ebeveyn karındaşı Resül Efendi b. Osman mahfil-i şer‘-i şerîfde müvekkil-i mezbûra rıkkını mu‘terif olan açık kaşlı, kara gözlü, uzun boylu, zenciyyü’l-asl işbu sâhibü’l-kitâb Ahmed b. Abdullah muvâcehesinde bi’l-vekâle ikrâr-ı tâm ve takrîr-i kelâm edip müvekkil-i mezbûr memlûkü olan mevsûf-ı mezbûru hasbeten lillâhi te‘âlâ ve hasbeten li-rûhi rasûli’l-mu‘âllâ ve rağbeten bimâ-kāle’n-nebiyyü’l-muhtâr: “Men a‘taka rakabeten mümineten a‘taka’llâhu te‘âlâ bi-külli udvin minhâ udven minhu mine’n-nâr” âzâd ve i‘tâk ve kayd-ı rıkdan ıtlâk eyledi, ba‘de’l-yevm mezbûr Ahmed sâir ahrâr-ı asliyyîn gibi hür olup üzerinde hakk-ı velâdan gayrı hakkı kalmadı dedikde mâ-vaka‘a gıbbe’t-taleb ketb ü sebt olundu. Tarhîren fi’l-yevmi’t-tâsi‘ min-Cemâziyelâhire min-şühûr li-sene erba‘a ve sittin ve elf. Şuhûdü’l-hâl: Davud b. Yahşi, Ali Beşe b. Yusuf, Osman b. Ahmed, el-Hâc Mehmed b. el-Hâc Ali, Pîrî Bey b. Hüseyin ve gayruhum mine’l-huzzâr.