Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 249 Hüküm no: 345 Orijinal metin no: [51a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed b. Abdullah’ın borcu olduğu Tuz emîni olan işbu hâmilü’s-sifr Hristos v. Yorgi nâm zimmî meclis-i şer‘-i hatîr-i lâzımü’t-tevkīrde Ahmed b. Abdullah nâm kimesne mahzarında üzerine da‘vâ ve takrîr-i kelâm edip mezbûr Ahmed zimmetinde cihet-i karz-ı şer‘îden üç bin akçe hakkım olup meblağ-ı mezbûrun doksan bir akçesini yedinden ahz ü istîfâ edip iki bin dokuz yüz dokuz akçe zimmetinde bâkīdir, suâl olunup alıverilmesi matlûbumdur dedikde gıbbe’s-suâl ve akībe’l-inkâr müdde‘î-i mezbûr Hristos’dan da‘vâsına mutâbıka beyyine taleb olundukda udûl-i Müslimîn’den Mehmed b. Abdullah ve diğer Mehmed b. Muslı nâm kimesneler li-ecli’ş-şehâde meclis-i şer‘a hâzırân olup isre’l-istişhâd fi’l-hakīka mezbûr Ahmed müdde‘î-i mezbûr Hristos’a cihet-i mezbûreden iki bin dokuz yüz dokuz akçe zimmetimde lâzımü’l-edâ ve vâcibü’l-kazâ deynimdir [deyü] bizim huzûrumuzda ikrâr u i‘tirâf eyledi, biz bu husûsa şâhidleriz şehâdet dahi ederiz deyü herbiri edâ-yı şehâdet-i şer‘iyye eylediklerinde gıbbe’t-ta‘dîli’ş-şer‘î şehâdetleri makbûle oldukdan sonra mûcebiyle meblağ-ı mezbûru müdde‘î-i mezbûra edâ etmek üzere mezbûr Ahmed’e ilzâm olunup mâ-vaka‘a bi’t-taleb ketb olundu. Fi’l-yevmi’t-tâsi‘ min-Cemâziyelâhire li-sene erba‘a ve sittin ve elf. Şuhûdü’l-hâl: İbrahim Çelebi b. Davud, Pîrî Beşe b. Hüseyin, Rıdvan b. Abdullah, el-Hâc Şa‘ban b. Ahmed ve gayruhum.