Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 145 Hüküm no: 67 Orijinal metin no: [16a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merhum Ali Beşe b. Hacı’nın karısı ve çocuklarının nafakası için tayin edilen akçenin vasîden alınıp varislerin ihtiyacı için harcanması Mahrûse-i Galata a‘mâlînden kasaba-i Kasımpaşaˈda Yeldeğirmeni mahallesinde sâkin iken bundan akdem Kili kasabasında fevt olan Ali Beşe b. Hacıˈnın verâseti zevce-i metrûkesi Havva bt. el-Hâc Hüseyin ile vâlidesi Sâliha bt. Aliˈye ve sulbî sagīr oğlu Mehmedˈe münhasıra olduğu şer‘an zâhir ve müte‘ayyin oldukdan sonra işbu bâ‘isetüˈl-vesîka merkūme Havva tarafından zikri câ’î husûsa vekîl olup mezbûrenin zâtını ma‘rifet-i şer‘iye ile ârifân olan Rasûl b. Ali ve Mehmed b. Ramazan şehâdetleriyle şer‘an vekâleti sâbite olan Ebûbekir Çelebi b. el-Hâc Osman meclis-i şer‘de sagīr-i mezbûrun tesviye-i emrine kıbel-i şer‘den mansûb vasîsi olup tereke-i müteveffâ-yı mezbûra vâzi‘uˈl-yed olan el-Hâc Hüseyin b. Ali mahzarında biˈl-vekâle üzerine da‘vâ ve takrîr-i kelâm edip müteveffâ-yı mezbûr mukaddemâ zikrolunan Kili kasabasına gittikden sonra müvekkilem mezbûreyi bilâ-nafaka ve kisve bırakıp nafakadan kemâl-i zarûreti olmağla bin seksen iki senesi Saferiˈnde mahrûse-i mezbûrede askerî olan İbrahim Efendi müvekkilem mezbûrenin ve bir hâdimesinin nafakası’çün ba‘deˈt-tahlîf küllî gāib zevci merkūme Ali Beşe üzerine yirmi akçe farz ve takdîr edip ve hîn-i zarûretde istidâneye vakt-i zaferde mezbûr Ali Beşe üzerine rücû‘a izin verdikden sonra târih-i mezbûrdan bin seksen üç senesi Şevvalˈi gāyetine gelince yirmi ayda müctemi‘ olan on iki bin akçe nafaka-i mefrûza-i müstedânesini müvekkilem mezbûre Havva Hatun kableˈl-ahz zevci merkūm Ali Beşe vefât etmekle zimmetinde kalmışdı deyü târih-i mezbûr ile müverraha ve merkūm İbrahim Efendi imzâ ve hatmini hâviye hüccet-i şer‘iye ibrâz edip vasî-i merkūm muvâcehesinde feth ü kırâet ve istintâk olundukda vasî-i mezbûr mazmûn-ı hüccet-i mezkûreyi inkâr edicek vekîl-i mezbûrdan mazmûn-ı hüccete beyyine taleb olundukda udûl-ı Müslimînˈden Osman Çelebi b. el-Hâc Mehmed ve Rasûl Beşe b. Ali nâm kimesneler li-ecliˈş-şehâde meclis-i şer‘a hâzırân olup isreˈl-istişhâd fiˈl-hakīka müvekkile-i mezbûreyi târih-i merkūmda kassâm-ı müşârün-ileyh İbrahim Efendi tahlîfden sonra gāib zevc-i mezbûr Ali Beşe üzerine müvekkile-i merkūme ile hâdimesi’çün günde yirmi akçe nafaka bizim huzûrumuzda farz ve takdîr edip hîn-i zarûretde istidâne ve vakt-i zaferde merkūm Ali Beşe üzerine rücû‘a izin verdi biz bu husûsa şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde müvekkile-i mezbûre muhadderâtdan olup meclis-i şer‘a huzûru müte’azzire olmağın tahlîfe kıbel-i şer‘den Mevlânâ Ömer Efendi irsâl olunup [16b] ol dahi müvekkile-i mezbûrenin menziline varıp zeyl-i sahîfede isimleri muharrer olan Müslimîn huzûrlarında merkūmeye aleˈl-vechiˈl-meşrû‘ yemîn teklîf ettikde ol dahi billâhi etmeğin mûcebiyle ba‘deˈl-hükm mâ vaka‘a biˈt-taleb ketb olundu. Fiˈl-âşir min-Muharremiˈl-harâm li-sene erba‘a ve semânîn ve elf. Şuhûdüˈl-hâl: Ahmed Çelebi b. Mehmed, Mehmed Ağa b. Süleyman, Hızır Beşe b. Oruç, İbrahim b. İlyas, Mehmed Çavuş Tophâneli, es-Seyyid Mustafa Çelebi b. Yusuf