Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 448 Hüküm no: 294 Orijinal metin no: [71a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Marsima’nın, merhume kızı Afife bt. Halife’den kendisine isabet eden ev ve eşya hisselerini, Afife’nin kocası Abdullah Çelebi’ye sattığı Medîne-i Galataˈya tâbi‘ kasaba-i Tophâneˈde Selime Hatun mahallesinde sâkine iken bundan akdem vefât eden Afîfe bt. Halîfe Efendi nâm hatunun verâseti zevci Abdullah Çelebi b. Ali Efendi vâlidesi Marsima bt. Abdülmennan nâm hatuna ve sadrî sagīr oğlu Mehmed Aliˈye münhasıra olduğu şer‘an zâhir ve müte‘ayyin ve mütehakkık oldukdan sonra mezbûre Marsima Hatun meclis-i şer‘-i hatîr-i lâzımüˈt-tevkīrde müteveffiye-i mezbûrenin muhallefâtına vâzi‘uˈl-yed olan zevci işbu bâ‘isüˈr-rakīm merkūm Abdullah Çelebi mahzarında ikrâr ve takrîr-i kelâm edip bundan esbak vefât eden zevcim mezbûr Halîfe Efendiˈnin muhallefâtından mahalle-i merkūmede vâki‘ Bali İmâm menzili demekle şehîr ledeˈl-ahâlî veˈl-cîran ma‘lûmüˈl-hudûd fevkānî ve tahtânî üç bâb oda ve havluyu ve dehliz ve bi’r-i mâ’ı ve zokak kapısını müştemil mülk menzilde olan semeni hisse-i şer‘iye-i şâyi‘amı râyic fiˈl-vakt dört bin beş yüz akçeye ve yine menzil-i mezbûrda kızım müteveffât-ı merkūme Afîfe Hatunˈdan bana isâbet eden südüs hisse-i şer‘iyeyi dahi mezbûruˈn-nakd beş bin iki yüz elli akçeye merkūm Abdullah Çelebiˈye bâtten bey‘ ve teslîm eyleyip ol dahi minvâl-i muharrer üzere iştirâ ve tesellüm eylediğinden sonra semenleri olan meblagayn-i mezbûreyni yedinden tamamen alıp kabz eylediğimden mâ‘adâ müteveffiye-i mezbûre Afifeˈnin muhallefâtı makbûlesinden olan nısf câriye bahâsından ve mezbûr Abdullah Çelebi zimmetinde mütekarrer ve ma‘kūdun-aleyh olan sekiz bin akçe mehr-i müeccelden ve izn-i şer‘le vekîlim Osman Efendi huzûrunda sûk-ı sultânîde bey‘ olunan elbise ve âvân-ı nühâs ve eşyâ-i sâire semenlerinden ber-mûceb-i defter-i kassâm hisse-i ma‘kūdem mukābelesinde bana isâbet eden mezkûrüˈn-nakd beş bin altı yüz otuz üç akçe ki min-haysüˈl-mecmû‘ on altı bin iki yüz seksen üç akçenin altı bin akçesini nısf câriye bahâsından zimmetinde olan altı bin akçe deynime takās ve meblağ-ı bâkī on [bin] iki yüz seksen üç akçeyi def‘a yedinden alıp kabz ve istifâ-i hak eyledim ba‘deˈl-yevm menzil-i mezbûrda asla alâkam kalmadığından gayrı muhallefât-ı mezkûreden dahi zimmetinde ve yedinde kat‘a hakkım yokdur dedikde gıbbeˈt-tasdîkiˈş-şer‘î mâ vaka‘a biˈt-taleb ketb olundu. Fiˈl-yevmiˈl-hâmis veˈl-işrîn min-şehri Recebiˈl-mürecceb li-sene erba‘a ve semânîn ve elf. Şuhûdüˈl-hâl: Zahrüˈl-müderrisîn Abdülaziz Efendi b. Mehmed Efendi, Osman Efendi b. Hasan el-imâm el-vekîl, Mehmed Çelebi b. Abdurrahman el-müezzin, Mustafa Çelebi b. Mehmed, Hasan Çelebi b. Süleyman, Ramazan Beşe b. Mustafa el-hayyât, Mehmed Çelebi el-kayyûm bi-Câmi‘-i Pirîzât Hatun, İbnüddin b. Eyüb el-hayyât