Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 449 Hüküm no: 296 Orijinal metin no: [71b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merhum İsmail Bey’den, karısı Mülayim ile beytülmala intikal edilen evin Mehmed Bey b. Ali’ye satıldığı Mahmiye-i Galataˈya tâbi‘ kasaba-i Kasımpaşaˈda Seyyid Ali Çelebi mahallesinde sâkin iken bundan akdem fevt olan İsmail Bey b. Abdullahˈın zevce-i metrûkesi Mülâyim bt. Abdullahˈdan gayrı zâhirde vâris-i ma‘rûfu olmamağla terekesinin rub‘ı zevcesine ve sülüs-ı erbâ‘ı beytü’l-mâle râci‘ olmağın hâlâ mezbûre Mülâyim tarafından husûs-ı câ’iˈz-zikre vekîl olup mezbûrenin verâsetini ma‘rifet-i şer‘iye ile ârifân olan Hızır Reis b. Mehmed ve Abdurrahman Çelebi b. Mustafa şehâdetleri ile şer‘an vekâleti sâbite olan Mehmed Çelebi b. Nasuh ile mahmiye-i mezbûre ve tevâbi‘i emîn-i beytü’l-mâl olan Mehmed Bey b. Ali meclis-i şer‘-i hatîrde işbu bâ‘isüˈl-vesîka Mehmed Çelebi b. Sefer mahzarında her biri ikrâr ve takrîr-i kelâm edip müteveffâ-yı mezbûrun mahalle-i mezbûrede vâki‘ bir tarafdan Kalaycı Abdi mülküne ve bir tarafından Aynî Hatun mülküne ve bir tarafından mahalle-i mezbûre avârızına mevkūfe menziline ve bir tarafdan tarîk-i [âmma] müntehîye bir bâb fevkānî ve bir bâb tahtânî odaları ve bağçeyi ve bi’r-i mâ’ı müştemil mülk menzilin rub‘ı zevcesine ve sülüs-ı erbâ‘ı cânib-i beytü’l-mâle intikāl ve isâbet etmekle menzil-i mezbûr sûk-ı sultânîde beyneˈt-tâlibîn nidâ ve müzâyede olundukda yedi bin beş yüz akçeden merkūm Mehmed Çelebi üzerinde karâr ve ziyâde ile tâlib-i âhar zuhûr etmediğinden mâ‘adâ meblağ-ı mezbûr menzil-i merkūmun semen-i misli olduğu sikāt haberiyle müntakil olundukdan sonra her biri vekâleten ve emâneten menzil-i mezbûrun meblağ-ı merkūm yedi bin beş yüz akçeye tarafeynden îcâb ve kabûlü hâvî bey‘-ı bâtt-ı sahîh ile bey‘ ve teslîm edip ol dahi iştirâ ve kabûl ve tesellüm ettiğinden sonra semeni olan meblağ-ı mezbûr yedi bin beş yüz akçeyi her birimiz minvâl-i muharrer üzere ba‘deˈt-tahsîs mezkûr Mehmed Çelebi yedinden biˈt-tamam veˈl-kemâl alıp kabz eyledik ba‘deˈl-yevm menzil-i mahdûd-ı mezbûr mezkûr Mehmed Çelebiˈnin mülk-i müşterâsıdır hasbemâ yeşâ ve yahtâr mutasarrıf olsun dedikde gıbbeˈt-tasdîkiˈş-şer‘î mâ vaka‘a biˈt-taleb ketb olundu. Fiˈl-âşir min-Şa‘baniˈl-mu‘azzam li-sene erba‘a ve semânîn ve elf. Şuhûdüˈl-hâl: eş-Şeyh Ahmed Efendi b. Mustafa, Ali Efendi b. Musa el-imâm, İbrahim Halîfe b. Ahmed Kapudan, Mehmed Beşe b. Ali, Salih Çelebi b. Bayram, el-Hâc Yusuf b. Abdullah, İsa Bey b. Halil