Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 451 Hüküm no: 298 Orijinal metin no: [71b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merhum Receb Reis’ten çocuklarına intikal eden gemi ve aletlerinin vasî tarafından borçların ödenmesi için Mehmed Beşe’ye satıldığı Mahmiye-i Galata a‘mâlinden kasaba-i Tophâneˈde Hoca Ali mahallesinde sâkin iken bundan akdem vefât eden Receb Reis nâm kimesnenin sulbî kebîr oğulları Mehmed ve Ali ile sagīr oğlu Mustafaˈnın tesviye-i umûruna kıbel-i şer‘den mansûb vasîsi olan Bayram Beşe b. İlyas meclis-i şer‘-i hatîrde işbu bâ‘isüˈr-rakīm Mehmed Beşe b. Süleyman mahzarında her biri ikrâr ve takrîr-i kelâm edip müteveffâ-yı mezbûrun düyûnu terekesine müstağraka olmağla terekesinden ancak mahmiye-i mezbûre hısnı ebvâbından Kürkçükapısı iskelesinde merbût on dokuz zirâ‘ şayka ta‘bîr olunur sefînenin beş sefîne demiri ve bir sandal ve bir kumanya ve bir kazgan ve bir tencere ve bir tâbe ve bir kahve ibriği ve mükemmel âlâtından yelkenler ve üç tabak-ı sagīre sahanın sülüs hisse-i şer‘iye hakkı olup düyûn-ı müsbete-i şer‘iyesi içün bey‘ lâzım gelmekle biˈl-izniˈş-şer‘î sûk-ı sultânîde hâssa münâdîlerden el-Hâc Mustafa b. Bayram yediyle beyneˈt-tâlibîn nidâ ve müzâyede olunup ba‘de inkıtâ‘ıˈr-rağbe yüz doksan beş esedî guruşdan mezbûr Mehmed Beşe üzerinde karâr ve ziyâde ile tâlib-i âhar zuhûr etmediğinden mâ‘adâ meblağ-ı mezbûr sâlifüˈz-zikr sefîne ve âlât-ı mezbûrenin sülüs hisse mezbûrenin semen-i misli olduğunu sıkāt haber verdiklerinden sonra her birimiz asâleten ve vesâyeten hisse-i mezkûreyi merkūm Mehmed Beşeˈye meblağ-ı mezbûr yüz doksan beş esedî guruşa bey‘-ı bâtt-ı sahîh-i şer‘î ile bey‘ ve teslîm ol dahi ba‘deˈl-iştirâ veˈt-tesellüm semeni olan meblağ-ı mezbûru merkūm Mehmed Beşe yedinden tamamen alıp kabz eyledik ba‘deˈl-yevm mârrüˈz-zikr sefînenin sülüs hissesi mezbûr Mehmed Beşeˈnin mülk-i müşterâsıdır hasbemâ yeşâ mutasarrıf olsun dedikde gıbbeˈt-tasdîkiˈş-şer‘ mâ-vaka‘a biˈt-tâlib ketb olundu. Fiˈl-âşir min-Şaʻbân sene [10]84. Şuhûdüˈl-hâl: Abdülaziz Efendi b. Mehmed, el-Hâc Mehmed b. Musa, el-Hâc Murad b. Yusuf, el-Hâc Süleyman b. Hasan, Bali b. Muharrem, Osman Reis b. Hasan, Durmuş b. Mahmud.