Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 451 Hüküm no: 299 Orijinal metin no: [71b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merhum Ahmed Beşe’den küçük çocuğuna kalan evin, borçların ödenmesi için satılmasına vasînin izin talep ettiği Mahrûse-i Galata dâhilinde merhûm ve mağfûrun-leh Sultân Bâyezid Han -tâbe serâhu- hazretleri mahallesi sükkânından iken bundan akdem vefât eden Ahmed Beşe b. ( ) nâm kimesnenin evlâd-ı sıgārına vasî-i muhtârı olan bâ‘is-i hâzeˈl-kitâb Süleyman Beşe b. Yusuf meclis-i şer‘de takrîr-i kelâm edip vasîsi olduğum müteveffâ-yı mezbûr Ahmed Beşeˈnin hâlâ düyûn-ı müsbete mütâlebesi terekesini müstağraka olup ve muhallefâtından edâ-i deyne sâlih ancak mahalle-i mezbûrede vâki‘ ma‘lûmüˈl-hudûd zimmetinden gayrı nükūd ve guruş kıymetinden ism-i mâl ıtlâk olunur şeyi olmamak ile zarûret-i deyni içün cânib-i şer‘den menzil-i mezbûrun bey‘ine izin taleb ederim dedikde hâkim-i muvakki‘-i kitâb hazretleri dahi husûs-ı mezkûru zeyl-i sahîfede isimleri mastûr olan sikāt-ı Müslimînˈden tefahhus ve istifsâr eylediklerinde fiˈl-hakīka hâl vasî-i mezbûrun bâlâda takrîr ve beyân eylediği vech üzere olduğu kemâ-hüveˈl-muharrer zâhire ve müte‘ayyine olmağın menzil-i mezbûrun vech-i meşrûh üzere bey‘ine vasî-i mezbûr Sinan Beşeˈye ba‘deˈl-izn mâ-vaka‘a biˈt-taleb ketb olundu. Hurrire fiˈl-yevmiˈl-hâmis veˈl-işrîn min-şehri Recebiˈl-ferd li-sene erba‘a ve semânîn ve elf. Şuhûdüˈl-hâl: Ali Bey b. Ahmed, Murteza Beşe b. Turhan, Yunus Beşe b. Ramazan, Ahmed b. Ali ve gayruhum