Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 618 Hüküm no: 431 Orijinal metin no: [102b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merhume Fatma bt. Osman’dan kalan paranın, varislerce vasî Mustafa Çelebi’den teslim alındığı Medîne-i Hazret-i Eyüb kazâsı a‘mâlinden Çatalca nâhiyesine tâbi‘ Baba Nakkaş nâm karyede sâkine iken bundan akdem vefât eden Fatma bt. Osman Ağa nâm sagīrenin verâseti vâlidesi Hadîce bt. Abdullah ile li-üm kız karındaşları Âişe ve Ümmügülsümˈe ve li-eb er karındaşı zahrüˈl-a‘yân Maksud Bey asâleten ve sagīretân-ı merkūmetânın babaları ve vasî-i mensûbları olan Kenan Bey b. Abdullah meclis-i şer‘-i hatîrde zikri câ’î meblağa biˈl-vekâle vâzi‘uˈl-yed olan işbu bâ‘isüˈl-kitâb Mustafa Çelebi b. Süleyman mahzarında her biri asâleten ve vesâyeten ikrâr ve takrîr-i kelâm edip müteveffât-ı merkūmenin vasîsi olan Ali Ağa b. Mustafa nâm kimesne yedinde olup ba‘dehû mezbûr Ali Ağa âhar diyâr[a] gitmekle merkūm Mustafa Çelebi yedinden biˈt-tamam alıp kabz eyledik min-ba‘d meblağ-ı mezbûr üç yüz yetmiş esedî guruşdan merkūm Mustafa Çelebi yedinde bir akçe ve bir habbe bâkī kalmadı dediklerinde gıbbeˈt-tasdîkiˈş-şer‘î mâ vaka‘a biˈt-taleb ketb olundu. Fiˈl-yevmiˈl-hâmis veˈl-işrîn li-sene erba‘a ve semânîn ve elf. Şuhûdüˈl-hâl: Fahrüˈl-a‘yân Ali Çelebi b. ( ), Mehmed Ağa b. Ali, Hüseyin Efendi b. Mahmud, Mehmed Çelebi b. Hüseyin, Osman Çelebi b. Mehmed