Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 618 Hüküm no: 432 Orijinal metin no: [102b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rabia bt. İbrahim’in, merhume azatlı cariyesi Zamâne’nin, Yusuf’daki alacağını sulh yoluyla tahsil ettiği Mahmiye-i Galata hâricinde Bedreddin Bey mahallesinde sâkine Râbia bt. İbrahim nâm hatun tarafından husûs-ı âtiˈl-beyâna vekîl olup mezbûrenin zâtını ma‘rifet-i şer‘iye ile ârifân olan Mehmed Çelebi b. Oruç ve Hasan Çelebi b. Musa şehâdetleri ile vekâlet-i sâbite olan Âişe [103a] bt. Murad nâm hatun meclis-i şer‘-i şerîfde bâ‘isüˈl-vesîka Yusuf b. Abdullah mahzarında biˈl-vekâle ikrâr ve takrîr-i kelâm edip müvekkilemin mu‘tekası olup bundan akdem fevt olan Zamâne bt. Abdullah nâm hatun hayatında mezbûr Yusufˈa yirmi şerîfî altın ikrâz ve teslîm edip kableˈl-ahz vefât ve biˈl-usûbetiˈn-nesebiye müvekkilem hasren vârisi olmağla meblağ-ı mezbûr biˈl-ırsiˈş-şer‘î müvekkileme intikāl ve isâbet etmekle ben dahi meblağ-ı mezbûru biˈl-vekâle mezbûr Yusufˈdan taleb eylediğimde ol dahi vech-i muharrer üzere kabzını ikrâr lâkin ba‘dehû yine mezbûre Zamâneˈye def‘ ve teslîm eyledim deyü def‘le mukābele eyledikde ben dahi merkūme Zamâneˈnin kabzını inkâr etmekle beynimizde münâza‘ât-ı kesîre vâkı‘a olmuş idi elhâletü hâzihî mezbûr Yusuf tavassut-ı musluhîn ile benimle an-inkâr on guruş üzerine inşâ-i akd-i sulh eyledikde ben dahi sulh-ı mezbûru kabûl ve bedel-i sulh olan meblağ-ı mezbûr on guruşu merkūm Yusuf yedinden biˈl-vekâle ahz u kabz edip mâ‘adâsı mutâlebesinden merkūm Yusufˈun zimmetini ibrâ-i âm ile ibrâ ve ıskāt eyledim min-ba‘d müvekkilem merkūmenin mezbûr Yusufˈda hak ve alâkası kalmadı dedikde gıbbeˈt-tasdîkiˈş-şer‘î mâ vaka‘a biˈt-taleb ketb olundu. Fiˈs-sâlis veˈl-işrîn min-Zilhiccetiˈş-şerîfe li-sene erba‘a ve semânîn ve elf. Şuhûdüˈl-hâl: el-Hâc Mehmed b. Abdullah, Musa Çelebi b. Receb, Mehmed Çelebi b. İbrahim, Hasan Beşe b. İbrahim, Hasan Çelebi b. Musa, Hüseyin Çelebi b. Ali