Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 621 Hüküm no: 436 Orijinal metin no: [103b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merhum Ahmed Beşe’den çocuklarına kalan ev hisseselerinin vasî tarafından Hüseyin Beşe ve Sâliha Hatun’a satıldığı Mahmiye-i Galataˈda Sultân Bâyezid mahallesinde sâkine iken bundan akdem vefât eden Ahmed Beşe b. Seferˈin verâseti zevce-i metrûkesi Sâliha bt. Abdullah ile sulbî oğuları Mustafa ve Ali ve Mehmed ve sulbiye kızları Hadîce ve Fatma ve Havvaˈya münhasıra olduğu şer‘an zâhir ve müte‘ayyin oldukdan sonra merkūm Mehmed ve mezbûre Havva sagīrler olmağla vasî-i muhtârları olan Bostan Beşe b. Mustafa meclis-i şer‘-i şerîfde işbu râfi‘üˈl-kitâb Hüseyin Beşe b. Abdullah ile hâlâ zevcesi olan merkūme tarafından ikrâr-ı câ’iˈz-zikri tasdîka vekîl olup zât-ı mezbûreyi ma‘rifet-i şer‘iye ile ârifân olan el-Hâc Halil Çelebi [b.] İbrahim ve Osman Beşe b. Mehmed şehâdetleri ile şer‘an vekâleti sâbite olan Yusuf Beşe b. Abdullah mahzarında biˈl-vesâye ikrâr ve takrîr-i kelâm edip müteveffâ-yı mezbûrun mahalle-i mezbûrede vâki‘ bir tarafında Şemsizâde Mehmed Çelebi mülküne ve bir tarafından Yusuf Çelebi oğulları mülklerine ve iki tarafında tarîk-i âmma müntehî tabaka-i süflâda bir oda ve bir matbah ve tabaka-i vüstâda iki oda ve tabaka-i ulyâda bir kilâr ve bir tahta bendi ve bir su kuyusunu ve kenîfi müştemil binâsı mülk olmak üzere ve arsasının senede mahalle-i mezbûre mescidi imâmına yüz yirmi akçe mukāta‘ası olan menzili mezbûr Ahmedˈin düyûn-ı müsbete-i kesîresi olmağla menkūlu vefâ etmemeğin bey‘i lâzım gelmeğin biˈl-izniˈş-şer‘î menzil-i mezbûr hâssa münâdîlerden Mehmed Bey b. Osman yediyle üç ay sûk-ı sultânîde beyneˈt-tâlibîn nidâ ve müzâyede olunup ba‘de inkıtâ‘iˈr-rağbe kırk esedî sekiz bin akçede mezbûre Sâliha ile merkūm Hüseyin Beşe üzerlerinde karâr ve ziyâde ile tâlib-i âharı zuhûr etmediğinden gayrı meblağ-ı mezbûr menzil-i mezkûrun semen-i misli olduğunu sikāt-ı sahîhüˈl-kelimât-ı Müslimîn haber verdiklerinden sonra menzil-i mezbûru biˈl-vesâye meblağ-ı merkūm kırk sekiz bin akçeye mezbûre Sâliha ile merkūm Hüseyin Beşeˈye aleˈl-iştirâkiˈs-seviy tarafeynden îcâb ve kabûlü hâvî ve bey‘-ı bâtt-ı sâhîh-i şer‘î ile bey‘ ve teslîm anlar dahi vech-i muharrer üzere iştirâ ve kabûl ve tesellüm eylediklerinden sonra semeni olan meblağ-ı mezbûrun nısfı olan yirmi dört bin akçeyi mezbûr Hüseyin Beşeˈde nısf-ı âharı olan yirmi dört bin akçenin on üç bin sekiz yüz yirmi iki akçesini merkūme Sâlihaˈya zevc-i müteveffâ-yı mezbûrdan ve ba‘de müte‘âkiben vefât eden oğulları Mustafa ve Ali ve kızları Hadîce ve Fatmaˈdan menzil hissesinden ber-mûceb-i defter-i kassâm kendiye â’id olan on üç bin sekiz [yüz] yirmi iki akçesine takās edip bâkī on bin yüz yetmiş sekiz akçesini nakid yedinden kabz eyledim ba‘deˈl-yevm menzil-i mezbûrun nısfı mezbûr Hüseyin Beşeˈnin ve nısf-ı merkūme Sâlihaˈnın mülk-i müşterâlarıdır hasbemâ yeşâ’ mutasarrıf olsunlar dedikde gıbbeˈt-tasdîkiˈl-mu‘teber mâ vaka‘a biˈt-taleb ketb olundu. Fiˈl-hâmis veˈl-işrîn min-Zilhiccetiˈş-şerîfe li-sene erba‘a ve semânîn ve elf. Şuhûdüˈl-hâl: Mehmed Efendi b. Rıdvan el-imâm, es-Seyyid Veli Çelebi b. Mehmed el-müezzin, Hasan Efendi b. Abdülvehhab, Mustafa Çelebi b. Mehmed, Derzi Mehmed, Hüseyin Beşe b. Dursun, İbrahim Çelebi b. Mahmud, Mehmed Çelebi b. Şemzâde, Ahmed b. Osman