Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 623 Hüküm no: 438 Orijinal metin no: [104a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Bey’in, merhum Ahmed Çelebi’nin çocuklarına yeni vasî tayin olduğu ve eski vasî Hüseyin Beşe’den tereke ve paraları teslim aldığı Mahmiye-i Galata a‘mâlinden kasaba-i Kasımpaşaˈda Tahtakādı mahallesinde sâkin iken bundan [akdem] vefât eden Ahmed Çelebi b. Mehmedˈin sagīr oğlu Mehmed ile sagīre kızı Fatma ve zevcesi batnında mevcûd hamlin tesviye-i emirlerine kıbel-i şer‘den mansûb vasîleri olan Ahmed Bey b. Halil meclis-i şer‘de Hüseyin Beşe b. Mustafa mahzarında biˈl-vesâye ikrâr ve takrîr-i kelâm vasîleri olduğum sagīrân-ı mezbûrân ile haml-i mezkûrun mezbûr Hüseyin Beşe vasîleri olmağla ber-mûceb-i defter-i kassâm makbûz ve makbûlü olan cem‘an otuz dört bin beş yüz on akçenin mezbûr Hüseyin Beşe ile huzûr-ı hâkimde muhâsebesini gördüğümde meblağ-ı mezbûrun beş bin beş yüz on akçesini mezbûr Hüseyin Beşe zamân-ı vesâyetinde müteveffâ-yı mezbûrun ba‘deˈt-taksîm düyûnuna ve sagīrlerin nafaka-i mefrûzalarına ve ba‘dehû fevt olan kızı Sâlihaˈnın techîz ve tekfînine ve menzil kirâsına harc ü sarf edip bâkī yedinde elli iki esedî ile ve her biri otuz sekizer paradan kırk esedî olmak üzere bin beş yüz yirmi Mısır parası ki cem‘an be-hesâb-ı cedîd hurde on bir bin kırk akçe olmak üzere doksan iki guruş ve dört semeni nakd ve bin sekiz yüz yetmiş akçe zimem ve on altı bin yüz kırk akçe bedel-i kitâbetinden min-haysüˈl-mecmû‘ yirmi dokuz bin akçe kaldıkdan sonra yerine ben vasî olunmağla hâlâ ben dahi biˈl-vesâye meblağ-ı mezbûr elli iki esedî ile kırk esedî olmak üzere bin beş yüz yirmi Mısır parası ki be-hesâb-ı cedîd hurde on bir bin kırk akçe nakid olup ve bin sekiz yüz yetmiş akçe zimem ve on altı bin yüz kırk akçe bedel-i kitâbetden gösterdikde ben dahi kabûl eyledim dedikde gıbbeˈt-tasdîkiˈş-şer‘î mâ vaka‘a biˈt-taleb ketb olundu. Fiˈr-râbi‘ mineˈl-Muharremiˈl-harâm li-sene hamse ve semânîn ve elf. Şuhûdüˈl-hâl: Ahmed Ağa Kethudâ-yı Pîrî, Abdullah Beşe b. Ahmed, Derzi Hasan Beşe b. Hüseyin, Kazzâz Mehmed Beşe b. Yusuf, Derzi Mehmed Beşe b. Mahmud