Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 624 Hüküm no: 439 Orijinal metin no: [104a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Osman’ın kocası merhum İbrahim Kapudan zimmetindeki mehir ve alacaklarını teslim alan vekilinin vasîsinden talep ettiği Mahmiye-i Galata muzâfâtından kasaba-i İstinyeˈde Kürkçü mahallesinde sâkine bâ‘isetüˈr-rakīm Âişe bt. Osman nâm hatun meclis-i şer‘de mahalle-i mezbûreden olup Bodğan vilâyetinde vefât [eden] el-Hâc Mehmed b. Osmanˈın sulbî sagīr oğlu Süleymanˈın tesviye-i emrine vasî olmağla biˈl-vesâye tereke-i müteveffâ-yı merkūme vâzi‘uˈl-yed olan el-Hâc Mehmed b. Ömer mahzarında üzerine da‘vâ ve takrîr-i kelâm edip zevcem olup mukaddemâ vefât eden Katarazoğlu demekle şehîr İbrahim Kapudan nâm kimesne zimmetinde mütekarrer olan iki yüz esedî guruş mehr-i müeccelim ile ikrâz ve teslîm ettiğim altı bin esedî guruş hakkımı mezbûr İbrahim Kapudanˈın terekesine kıbel-i şer‘den kayyım nasb ve ta‘yîn olunan işbu hazır biˈl-meclis el-Hâc Ali b. Mehmed nâm kimesne muvâcehesinde huzûr-ı hâkimde şuhûd-ı udûlle isbât ettiğimden sonra düyûnu terekesine müstağrak olmağla ber-mûceb-i defter-i kassâm benim altı bin iki yüz esedî guruş hakkıma bi-tarîkıˈl-guremâ dört yüz yetmiş yedi esedî guruş isabet etmekle ben dahi karındaşım müteveffâ-yı mezbûr el-Hâc Mehmedˈe meblağ-ı mezbûr dört yüz yetmiş yedi esedîyi merkūm el-Hâc Aliˈden kabz ve bana îsâle emretmekle ol dahi emrime binâen kabz ve kendi mesârifine sarf edip bana edâ etmedi vefât etmeğin hâlâ terekesine biˈl-vesâye vâzi‘uˈl-yed olan mezkûr Mahmudˈdan meblağ-ı mezbûr dört yüz yetmiş yedi esedî guruş hakkımı taleb ederim suâl olunsun dedikde gıbbeˈs-suâl veˈl-inkâr müdde‘iyye-i mezbûreden müdde‘âsına beyyine taleb olundukda udûl-ı Müslimînˈden Hasanzâde Mehmed Çelebi b. el-Hâc Mustafa ve Osman Çelebi b. el-Hâc Yusuf nâm kimesneler li-ecliˈş-şehâde meclis-i şer‘a hâzırân olup isreˈl-istişhâd fiˈl-hakīka müteveffâ-yı mezbûrenin bi-tarîkıˈl-guremâ hakkı olan dört yüz yetmiş yedi esedî guruşunu merkūm el-Hâc Ali yedinden müdde‘iyye-i mezbûrenin emriyle huzûrumuzda kabz eyledi biz bu husûsa şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde gıbbe ri‘âyet-i şerâ’itiˈl-kabûl şehâdetleri makbûle oldukdan sonra meblağ-ı mezbûr dört yüz yetmiş yedi esedî guruşu müteveffâ-yı merkūm el-Hâc Mahmudˈdan küllen ve ba‘zan ahz u kabz veyâ havâle veyâhûd turûk-ı şer‘iyeden bir tarîk ile zimmetini ibrâ etmediğine mezbûre Âişeˈye yemîn teklîf olundukda ol dahi hasbeˈl-mesûl yemîn billâh-i te‘âlâ edicek mûcebiyle hükm birle mâ vaka‘a biˈt-taleb ketb. Fiˈs-sâdis mineˈl-Muharremiˈl-harâm li-sene hamse ve semânîn ve elf. Şuhûdüˈl-hâl: Ömer Efendi b. Ali, İbrahim Efendi b. Mustafa, el-Hâc Ali b. Mehmed, Hüseyin b. Ali ve gayruhum.