Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 625 Hüküm no: 440 Orijinal metin no: [104a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merhum Mehmed Beşe’nin küçük oğlu için vasiye günlük nafaka takdir edildiği Mahmiye-i Galata muzâfâtından kasaba-i Tophâneˈde Cihangir mahallesinde sâkine bundan [akdem] vefât eden Mehmed Beşe b. Ahmedˈin sulbî sagīr oğlu Mehmedˈin babasından müntakil mûrisinden küllî yevm nafaka ve kisve-bahâsı’çün kadr-ı kifâye meblağ farz ve takdîr olunması kıbel-i şer‘den mansûb vasîsi olan bâ‘isüˈl-vesîka Ahmed Ağa b. Musa taleb etmeğin hâkim-i muvakki‘-i sadr-ı kitâb tûbâ-lehû ve hüsnü-meâb dahi târih-i kitâbdan sagīr-i mezbûrun nafaka ve kisve-bahâsı’çün mal-ı mûrisden küllî yevm beş akçe farz ve takdîr edip vakt-i zarûretde istidâne ve hîn-i zaferde rücû‘a vasî-i mezbûra izin birle mâ vaka‘a biˈt-taleb ketb olundu. Fî-gurreti Saferiˈl-hayr li-sene hams ve semânîn ve elf. Şuhûdüˈl-hâl: Abdülbaki b. Musa, Mehmed Beşe b. Abdünnebi, İsa Bey b. Halil, Hüseyin b. Ali, Ahmed Beşe b. Osman, Mehmed Çelebi b. Ali, Hüseyin b. Hasan