Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 625 Hüküm no: 441 Orijinal metin no: [104b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sinan Reis’in, merhum Kaymak Kapudan b. Rıdvan’daki alacağını varislerden talep ettiği Mahmiye-i Galata hâricinde Şahkulu mahallesinde sâkin iken bundan akdem vefât eden Kaymak Kapudan b. Rıdvanˈın verâseti zevce-i metrûkesi Âişe Hanım bt. Mehmed ile vâlidesi Hadîce bt. Hasanˈa münhasıra olduğu şer‘an zâhir ve müte‘ayyin oldukdan sonra işbu bâ‘isüˈl-vesîka Sinan Reis b. Mehmed meclis-i şer‘de mezbûretân Âişe ve Hadiceˈnin vekîl-i müseccelleri olup tereke-i müteveffâ-yı mezbûre vâzi‘uˈl-yed olan Ramazan Çelebi b. Yusuf mahzarında üzerine da‘vâ ve takrîr-i kelâm edip müteveffâ-yı mezbûrun zimmetinde karzdan ba‘de küllî hesâb yüz doksan dört esedî guruş hakkım olup meblağ-ı mezbûrdan ba‘de elli guruş dahi alıp bâkī yüz kırk dört esedî guruş hakkımı kableˈl-istifâ fevt olup hâl-i hayatında meblağ-ı mezbûr yüz doksan dört esedî zimmetinde bana deyni olduğunu alâ-ruûsiˈl-işhâd ikrâr ve işhâddahi etmekle hâlâ terekesinden taleb ederim suâl olunsun dedikde gıbbeˈs-suâl ve akībeˈl-inkâr ve ba‘de talebiˈl-beyyine udûl-ı Müslimînˈden Mustafa Kapudan b. Abdullah ve Osman b. Nasuh nâm kimesneler li-ecliˈş-şehâde meclis-i şer‘a hâzırân olup isreˈl-istişhâd fiˈl-vâki‘ müteveffâ-yı mezbûr hayatında meblağ-ı mezbûr yüz doksan dört esedî guruş mezbûr Sinan Reisˈe zimmetimde deynimdir deyü huzûrumuzda ikrâr ve bizi işhâd dahi biz bu husûsa şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde isre-ri‘âyet-i şerâ’itiˈl-kabûl şehâdetleri makbûle oldukdan sonra müdde‘î-i mezbûr Sinan Reis ba‘deˈt-tahlîfiˈş-şer‘iyiˈl-mu‘teber mûcebiyle hüküm birle mâ vaka‘a biˈt-taleb ketb olundu. Fiˈs-sâmin mineˈl-Muharremiˈl-harâm li-sene hamse ve semânîn ve elf. Şuhûdüˈl-hâl: Zahrüˈl-eimmetiˈl-kirâm Mehmed Efendi eş-şehîr Benâm Çelebi, Mehmed Çelebi tâbi‘-i kassâm-ı İstanbul, İbrahim Çelebi b. Abdülbaki, Hüseyin Çelebi b. Ali, Ahmed b. Osman