Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 626 Hüküm no: 442 Orijinal metin no: [104b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed’in, merhum Mehmed b. Osman’ın küçük oğlu Süleyman’a vasî tayin olduğu Mahmiye-i Galataˈya tâbi‘ nefs-i İstinyeˈde Kürkçübaşı mahallesinden olup bundan akdem Boğdan vilâyetinde vefât eden el-Hâc Mehmed b. Osmanˈın sulbî sagīr oğlu Süleyman Beşe babası müteveffâ-yı merkūmdan intikāl eden malını hıfz ve hâlini zabta bir vasîden lâ-büd olmağla istikāmetle ma‘rûf ve sadâkatle mevsûf işbu râfi‘üˈl-vesîka diğer el-Hâc Mehmed b. Ömer nâm kimesnenin her vechile diyânet ve emr-i vesâyetle sadâkat ve istikāmeti yine nefs-i İstinye sükkânından olup zeyl-i kitâbda isimleri muharer olan sikāt-ı sahîhüˈl-kitâb Müslimîn hâkim-i muvakki‘-i sadr-ı kitâb tûbâ-lehû ve hüsnü-meâb hazretlerine haber verdiklerinden sonra hâkim-i müşârün-ileyhdahi mezbûr el-Hâc Mehmed beni minvâl-i muharrer üzere sagīr-i mezbûrun tesviye-i emrine vasî nasb ve ta‘yîn ettikde ol dahi kabûl ve merâsimini edâya müte‘ahhid olmağın mâ vaka‘a biˈt-taleb ketb olundu. Fiˈl-yevmiˈt-tâsi‘-i aşer mineˈl-Muharremiˈl-harâm li-sene hamse ve semânîn ve elf. Şuhûdüˈl-hâl: Ahmed Çelebi b. el-Hâc Süleyman, Mustafa Çelebi b. el-Hâc Ali, Hasan Çelebi b. Ali, Mehmed Ağa b. Mustafa, Mustafa Çelebi b. Ali, Osman Çelebi b. Mehmed, Mehmed Çelebi b. Yahya, Ahmed Beşe b. Süleyman, Mehmed Bey b. Mustafa, İbrahim Çelebi b. Mustafa, İbrahim Çelebi b. Ahmed, Eyüb Çelebi b. Ahmed, Yusuf Çelebi b. Mustafa