Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 627 Hüküm no: 443 Orijinal metin no: [104b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hatun bt. Osman’ın, kardeşi merhum Mehmed’deki alacağını vasîden talep ettiği Mahrûse-i Galataˈya tâbi‘ kasaba-i İstinyeˈde Kürkçübaşı mahallesinde sâkine râfi‘a-i hâzeˈl-kitâb Âişe Hatun bt. Osman meclis-i şer‘-i hatîr-i lâzımüˈt-tevkīrde mahalle-i mezbûre sükkânından olup bundan akdem Boğdan vilâyetinde vefât eden mezbûre Âişe Hatunˈun karındaşı el-Hâc Mehmed b. Osmanˈın sulbî oğlu Süleyman nâm sagīrin tesviye-i umûruna cânib-i şer‘den mansûb vasîsi olan el-Hâc Mehmed b. Ömer nâm kimesne mahzarında üzerine da‘vâ ve takrîr-i kelâm edip karındaşım müteveffâ-i mezbûr el-Hâc Mehmed zimmetinde cihet-i deyn-i şer‘îden altı yüz kıt‘a esedî guruş hakkım olup hatta meblağ-ı merkūm vech-i meşrûh üzere bana deyni olduğunu hayatındaalâ-ruûsiˈl-işhâd ikrâr dahi edip kableˈl-edâ vefât etmekle hâlâ terekesinden taleb ederin suâl olunsun dedikde gıbbeˈs-suâl ve akībeˈl-inkâr ve isre-talebiˈl-beyyine udûl-ı ricâl-i Müslimînˈden ve sikāt-ı muvahhidînden olup zikri sebk eden Kürkçübaşı mahallesinden İbrahim Bey b. Ahmed ve Ahmed Çelebi b. Pîrî nâm kimesneler li-ecliˈş-şehâde meclis-i şer‘a hâzırân olup isreˈl-istişhâd fiˈl-vâki‘ müteveffâ-yı mezbûr el-Hâc Mehmed hâl-i hayatında ve kemâl-i akl-ı sıhhatinde kız karındaşı işbu müdde‘iyye-i mezbûre Âişe Hatun cihet-i deyn-i şer‘îsinden zimmetimde vâcibüˈl-edâ altı yüz kıt‘a esedî guruş deynim vardır deyü huzûrumuzda ikrâr ve bizi işhâd eyledi biz bu husûsa şâhidiz şehâdet dahi ederiz deyü her biri edâ-i şehâdet eylediklerinde gıbbeˈt-ta‘dîl veˈt-tezkiye şehâdetleri makbûle oldukdan sonra meblağ-ı mezbûru müdde‘iyye-i mezkûre müteveffâ-yı merkūmenin hayatında küllen ve ba‘zan ahz ve istifâ veyâhûd taraf-ı şer‘iyeden bir tarîk ile zimmetini ıskāt ve ibrâ eylediğine gıbbeˈt-tahlîf mûcebiyle ba‘deˈl-hükm mâ vaka‘a biˈt-taleb ketb olundu. Fiˈl-yevmiˈl-âşir mineˈl-Muharremiˈl-harâm li-sene hamse ve semânîn ve elf. Şuhûdüˈl-hâl: Hüseyin Çelebi b. Solak, el-Hâc Hüseyin b. Hasan, Ahmed b. Mehmed, Hüseyin b. Ali, Ahmed b. Abdullah