Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 628 Hüküm no: 444 Orijinal metin no: [105a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Osman’ın, merhum Mehmed’deki alacağını vasîden talep ettiği Mahmiye-i Galata muzâfâtından kasaba-i İstinyeˈden Kürkçübaşı mahallesinde sâkine bâ‘isetüˈl-vesîka Âişe bt. Osman nâm hatun meclis-i şer‘de mahalle-i mezbûreden olup bundan akdem Boğdan vilâyetinde vefât eden el-Hâc Mehmed b. Osman nâm kimesnenin sulbî oğlu Süleyman nâm sagīrin kıbel-i şer‘den mansûb vasîsi olup tereke-i müteveffâ-yı mezbûra biˈl-vesâye vâzi‘uˈl-yed olan el-Hâc Mehmed b. Ömer mahzarında üzerine da‘vâ ve takrîr-i kelâm edip müteveffâ-yı mezbûre bin yetmiş dokuz senesi Rebî‘ülevveliˈnde bi-tarîkıˈl-karz sekiz yüz elli esedî guruş def‘ ve teslîm edip hatta yedime hatt u hatmini hâvî deyn tezkiresi dahi verdikden sonra kableˈl-ahz veˈl-istifâ vefât edip hâl-i hayatında meblağ-ı mezbûr zimmetinde ana deyni olduğunu huzûr-ı şuhûdda ikrâr ve işhâd dahi etmekle hâlâ terekesinden taleb ederim vasî-i mezbûreye suâl olunsun dedikde gıbbeˈs-suâl veˈl-inkâr ba‘de talebiˈl-beyyine udûl-ı Müslimînˈden olup mahmiye-i İstanbulˈda Darbhâne mahallesinde sâkin Mustafa b. Mahmud nâm kimesne ile kasaba-i merkūmede sâkine Asiye bt. Yahya ve Fatma bt. Turgud nâm hatunlar li-ecliˈş-şehâde meclis-i şer‘a hâzırûn isreˈl-istişhâd fiˈl-vâki‘ müteveffâ-yı mezbûr hayatında müdde‘iyye-i mezbûreye bi-tarîkıˈl-karz sekiz yüz elli esedî guruş zimmetimde deynimdir deyü huzûrumuzda ikrâr ve bizi işhâd eyledi biz bu husûsa şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde gıbbe ri‘âyet-i şerâ’itiˈl-kabûl şehâdetleri makbûle oldukdan sonra mûcebiyle hüküm birle vaka‘a biˈt-taleb ketb olundu. Fiˈl-yevmiˈs-sâmin mineˈl-Muharrem li-sene hamse ve semânîn ve elf. Şuhûdüˈl-hâl: Ramazan Efendi b. el-Hâc İsmail, eş-Şeyh Mustafa Çelebi b. Yusuf, Mosturacı Hüseyin Çelebi b. Ali, Hasan Efendi b. İshak, Baklavacı Ali Ağa b. Mehmed, el-Hâc Ahmed b. Süleyman, Ömer Efendi b. Ali, Molla İbrahim b. Mustafa, Ahmed b. Osman, Hüseyin Çelebi b. Ali ve gayruhum.