Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 628 Hüküm no: 445 Orijinal metin no: [105a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim b. Ali’nin, merhum Mustafa Beşe’nin varisi olduğunu ispat edip vasî Mehmed’den terekeyi teslim aldığı Fiˈl-asl vilâyet-i Anadoluˈda Konya sancağında Arhon kazâsına tâbi‘ Kinise nâm karyeden olup mahmiye-i Galata dâhilinde Kuşadalı odalarında sâkin İbrahim b. Ali meclis-i şer‘-i hatîrde işbu bâ‘isüˈl-vesîka el-Hâc Mehmed b. Musa mahzarında ikrâr ve takrîr-i kelâm edip mahmiye-i mezbûrede el-Hâc Ali odalarında misâfir iken bundan akdem vefât eden Mustafa Beşe b. Ali nâm kimesnenin beni ve işbu hazır biˈl-meclis Derviş Beşe b. Seyid nâm kimesne biˈl-usûbetiˈn-nesebiye vârisleri olduğumuzu mezbûr Derviş Beşe mukaddemâ huzûr-ı hâkimde ba‘deˈl-isbât merkūm el-Hâc Mehmed müteveffâ-yı merkūmun vasî-i muhtârı olmağla terekesine vâzi‘-i vâzi‘uˈl-yed olmağın mezkûr Derviş Beşe mezbûr el-Hâc Mehmedˈin yedinden mukaddemâ müteveffâ-yı mezbûrun vasiyyeti üzere terekesinden harc u sarf ettikden sonra bâkī kalan kalîl ve kesîr muhallefâtı mezbûr Derviş Beşe merkūm el-Hâc Mehmed yedinden alıp kabz edip hâlâ ben dahi mezkûr el-Hâc Mehmed yedinden yirmi esedî guruş dahi kabz edip mezbûr el-Hâc Mehmed yediyle müteveffâ-yı mezbûrun terekesinde hak ve alâkamız kalmayıp husûs-ı mirasa müte‘allika âmme-i da‘vâdan mezbûr el-Hâc Mehmedˈin zimmetini ibrâ-i âm ile ibrâ ve ıskāt eyledim dedikde gıbbeˈt-tasdîkiˈş-şer‘î mâ vaka‘a biˈt-taleb ketb olundu. Fiˈs-sâmin mineˈl-Muharremiˈl-harâm li-sene hamse ve semânîn ve elf. Şuhûdüˈl-hâl: Mahmud Çelebi b. el-Hâc Ali, Ahmed Çelebi b. el-Hâc Hasan, el-Hâc Mustafa b. Musa, Mehmed Çelebi b. Rıdvan, Hasan Çelebi b. Habib, Mustafa Çelebi b. Mehmed, İbrahim b. Ömer, Altı Mustafa b. Yusuf, Ahmed b. Osman, Ahmed Çelebi b. el-Hâc Hüseyin, Nasuh Beşe b. Abdullah