Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 635 Hüküm no: 448 Orijinal metin no: [106a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatice bt. Abdullah’ın, merhum kocasındaki mehrini vasî Ali Efendi’den talep ettiği Mahmiye-i Galata muzâfâtından kasaba-i Tophâneˈde Kuloğlu mahallesinde sâkine iken bundan akdem vefât eden Hadîce bt. Abdullah ile kebîr oğlu Abdullah Çelebiˈye ve sagīr oğlu Abdullatif Çelebiˈye münhasıra olduğu şer‘an zâhir ve müte‘ayyin oldukdan sonra işbu bâ‘isetüˈl-kitâb mezbûre Hadîce meclis-i şer‘-i hatîrde sagīr oğlu mezbûrun kıbel-i şer‘de mansûb vasîsi olmağla tereke-i müteveffâ-yı mezbûre vâzi‘uˈl-yed olan Ali Efendi b. ( ) mahzarında üzerine da‘vâ ve takrîr-i kelâm edip zevcem müteveffâ-yı mezbûrun zimmetinde ma‘kūdun-aleyh olan yüz riyâl guruş mehr-i müeccelimi kableˈl-istifâ fevt olmağla hâlâ terekesinden taleb ederim suâl olunsun dedikde gıbbeˈs-suâl veˈl-inkâr ve isre-talebiˈl-beyyine udûl-ı Müsliminden zahrüˈl-kuzât Ahmed Efendi b. Muharrem ve Ahmed Çelebi b. Mehmed nâm kimesneler li-ecliˈş-şehâde meclis-i şer‘a hâzırân olup isreˈl-istişhâd fiˈl-hakīka müteveffâ-yı mezbûr hayatında zevcem mezkûrenin yüz riyâli guruş mehr-i müeccelini zimmetimde deynimdir deyü huzûrumuzda ikrâr ve bizi [işhâd] eyledi biz bu husûsa şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde isre-ri‘âyet-i şerâ’itiˈl-kabûl şehâdetleri makbûle oldukdan sonra müdde‘iyye-i mezbûre ba‘deˈt-tahlîf mûcebiyle hükm birle mâ vaka‘a biˈt-taleb ketb olundu. Fiˈl-âşir mineˈl-Muharremiˈl-harâm li-sene hamse ve semânîn ve elf. Şuhûdüˈl-hâl: İbrahim Ağa b. Hızır, Ali Ağa b. Hasan, Abdurrahman Çelebi b. Eyüb, Hasan Çelebi b. Ahmed, Mehmed Çelebi b. Ali