Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 637 Hüküm no: 450 Orijinal metin no: [106b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vasî Mehmed’in, cariye Daye için merhum Mehmed’in karısı Sâliha’ya açtığı davada haksız olduğu Mahmiye-i Galataˈya tâbi‘ kasaba-i İstinyeˈde Kürkçübaşı mahallesinden olup vilâyet-i Boğdanˈda vefât [eden]el-Hâc Mehmed b. Osmanˈın verâseti zevce-i metrûkesi Sâliha bt. İbrahim ile sulbî sagīr oğlu Süleymanˈa münhasıra olduğu şer‘an zâhir oldukdan sonra sagīr-i mezbûrun tesviye-i emrine kıbel-i şer‘den mansûb vasîsi olan el-Hâc Mehmed b. Ömer meclis-i şer‘de işbu râfi‘atüˈl-vesîka mezbûre Sâliha mahzarında üzerine da‘vâ ve takrîr-i kelâm edip müteveffâ-yı mezbûrun mülkü olan işbu orta boylu, açık kaşlı, Rusiyyetüˈl-asl Dâye bt. Abdullah nâm câriye-i memlûkesine mezbûre Sâliha benim mülkümdür deyü nâ-hak vaz‘-ı yed eder suâl olunup üzerinde yed-i âdiyesini nez‘ olunması biˈl-vesâye murâdımdır dedikde gıbbeˈs-suâl mezbûre Sâliha cevâbında câriye-i mezbûre benim mülkümdür zevcem müteveffâ-yı mezbûrun alâka ve medhali yokdur deyü husûs-ı mezbûrda merkūme Sâliha yemîni ile musaddak olmağın biˈt-taleb merkūme Dâye kendi mülkü olup müteveffâ-yı merkūmun hak ve alâkası olmadığına mezbûre Sâlihaˈya yemîn teklîf olundukda ol dahi hasebüˈl-mesûl yemîn billâhiˈl-aliyyüˈl-a‘lâ edicek mûcebiyle bî-vech ta‘arruzdan vasî-i mezbûr men‘ olunup mâ vaka‘a biˈt-taleb ketb olundu. Fiˈl-âşir mineˈl-Muharremiˈl-harâm li-sene hamse ve semânîn ve elf. Şuhûdüˈl-hâl: Hüseyin Çelebi b. Ali, Abdülbaki Beşe el-mübâşir, Ahmed Çelebi b. Süleyman, Mustafa Çelebi b. Mehmed, Osman Çelebi b. Mehmed, Mehmed Ağa b. Mustafa.