Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 638 Hüküm no: 451 Orijinal metin no: [106b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sâliha bt. İbrahim’in, kocası merhum Mehmed’deki mehir alacağını vasî Mehmed b. Ömer’den talep ettiği Mahmiye-i Galataˈya tâbi‘ kasaba-i İstinyeˈde Kürkçübaşı mahallesinden olup vilâyet-i Boğdanˈda vefât eden el-Hâc Mehmed b. Osmanˈın verâseti zevce-i metrûkesi Sâliha bt. İbrahim ile sulbî sagīr oğlu Süleymanˈa münhasıra olduğu şer‘an zâhir oldukdan sonra işbu bâ‘isetüˈl-vesîka mezbûre Sâliha meclis-i şer‘de sagīr-i mezbûrun tesviye-i emrine kıbel-i şer‘den mansûb vasîsi olmağla tereke-i müteveffâ-yı mezbûra biˈl-vesâye vâzi‘uˈl-yed olan el-Hâc Mehmed b. Ömer mahzarında üzerine da‘vâ ve takrîr-i kelâm edip zevcem müteveffâ-yı mezbûrun zimmetinde ma‘kūdun-aleyh olan iki yüz guruş olmak üzere yirmi bin akçe mehr-i müecceli kableˈl-istifâ fevt olmağla hâlâ terekesinden taleb ederim vasî-i mezbûra suâl olunsun dedikde gıbbeˈs-suâl veˈl-inkâr müdde‘iyye-i mezbûrede müdde‘âsına beyyine taleb olundukda udûl-ı Müslimînˈden mahmiye-i mezbûrede Câmi‘-i Kebîr imâmı olan Mehmed Efendi eş-Şehîr bi-imâm Çelebi ve Osman Çelebi b. el-Hâc Yusuf nâm kimesneler li-ecliˈş-şehâde meclis-i şer‘a hâzırân olup isreˈl-istişhâd fiˈl-vâki‘ müteveffâ-yı mezbûr huzûrumuzda mezbûreyi vech-i muharrer üzere iki yüz guruş olmak üzere yirmi bin akçe mehir üzerine tezevvüc ol dahi nefsini tezvîc eyledi biz bu husûsa şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde isre-ri‘âyet-i şerâ’itiˈl-kabûl şehâdetleri makbûle oldukdan sonra müdde‘iyye-i mezbûre ba‘deˈt-tahlîf mûcebiyle hüküm birle mâ vaka‘a biˈt-taleb ketb olundu. Fiˈl-âşir mineˈl-Muharremiˈl-harâm li-sene 1085. Şuhûdüˈl-hâl: es-Sâbıkūn