Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 639 Hüküm no: 452 Orijinal metin no: [107a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Beytülmal emini Mehmed Ağa’nın, Ömer Beşe’den varissiz ölen Halil b. Celil’e olan borcu talep ettiği Mahmiye-i Galata hâricinde kasaba-i Tophâneˈde Çukurcum‘a mahallesinde sâkin iken bundan akdem vefât eden Halil b. Celilˈin zâhirde vâris-i ma‘rûfu olmamak ile terekesi cânib-i beytü’l-mâle âyid olmağın hâlâ mahmiye-i mezbûre beytü’l-mâl emîni olan bâ‘isüˈl-kitâb Mehmed Ağa b. Ali meclis-i şer‘de yine mahmiye-i mezbûre sâkinlerinden Ömer Beşe b. ( ) mahzarında biˈl-emâne üzerine da‘vâ ve takrîr-i kelâm edip müteveffâ-yı mezbûrun mersûm Ömer Beşe zimmetinde cihet-i karz-ı şer‘îden otuz sekiz bin sekiz yüz akçe hakkı olup meblağ-ı mezbûru kableˈl-ahz vefât etmekle cânib-i beytü’l-mâle âyid olmağın hâlâ emânet-i mahkiyem hasebiyle meblağ-ı mezbûru taleb ederim suâl olunup alıverilmesi matlûbumdur dedikde gıbbeˈs-suâl mezbûr Ömer Beşe cevâbında fiˈl-vâki‘ meblağ-ı mezbûr otuz sekiz bin sekiz yüz müteveffâ-yı mezbûre zimmetimde deynim olup meblağ-ı mezbûrdan on beş bin akçeyi hâne bahâsından ve bir def‘a dahi sekiz bin beş yüz nakid akçe ve bir def‘a dahi bin iki yüz akçe dahi ba‘de ki cem‘an yirmi dört bin yedi yüz akçesini müteveffâ-yı mezbûra hâl-i hayatında ve kemâl-i sıhhatinde ref‘ ve teslîm edip ancak zimmetimde on dört bin yüz deynim kalmışdır deyü ikrâr mâ‘adâ def‘ ile mukābele edicek gıbbeˈl-istintâk veˈl-inkâr mezbûr Ömer Beşeˈnin def‘-i mezkûrunu mübeyyine beyyine taleb olundukda udûl-ı Müslimîn ricâlden olup sâkin Mustafa b. Mehmed ve Hüseyin b. Mehmed li-ecliˈş-şehâde meclis-i şer‘a hâzırân olup istişhâd olunduklarında fiˈl-vâki‘ mezbûr Ömer Beşe on beş bin akçeyi hâne bahâsından ve sekiz bin beş yüz akçe bir def‘a ve bin iki yüz akçe bir def‘a dahi cem‘an yirmi dört bin yedi yüz akçeyi bizim huzûrumuzda müteveffâ-yı mezbûra hâl-i hayatında ve kemâl-i sıhhatinde def‘ ve teslîm edip ol dahi kabz eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde ba‘deˈt-ta‘dîl veˈt-tezkiye şehâdetleri makbûle olmağın meblağ-ı mezbûr yirmi dört bin yedi yüz akçeyi talebinden emîn-i mûmâ-ileyh men‘ olunup ikrârı olan meblağ-ı mezbûr on dört bin yüz akçeyi emîn-i mesfûra teslîme mezbûr Ömer Beşeˈye tenbîh birle mâ vaka‘a biˈt-taleb ketb olundu. Fiˈl-yevmiˈs-sâbi‘-i aşer mineˈl-Muharremiˈl-harâm li-sene hamse ve semânîn ve elf. Şuhûdüˈl-hâl: Ali Beşe b. Halil, Hüseyin Çelebi b. Mehmed, Ahmed Çelebi b. Murad, Ömer Efendi b. Ali ve gayruhum mineˈl-hâzırîn.