Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 651 Hüküm no: 457 Orijinal metin no: [108b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mihrican bt. Abdullah’ın, merhum Halil Kapudan’ın azatlı cariyesi olduğundan varislerin cariye üzerindeki hak taleplerinin reddildiği İşbu orta boylu, çatık kaşlı, kara gözlü, Gürciyyetüˈl-asl Müslimetüˈl-mille râfia‘-i hâzeˈl-kitâb Mihrican bt. Abdullah meclis-i şer‘-i şer‘-i hatîr-i lâzımüˈt-tevkīrde mahmiye-i Galata hâricinde Tophâneˈde Süheyl Bey mahallesinde sâkin iken bundan akdem müteveffâ olan Uzun Halil Kapudanˈın vâlidesi bundan esbak müteveffât olan Paşa Hatunˈun sadriye kebîre kızı Hindî Hatun bt. Yusuf nâm hatun mahzarında üzerine da‘vâ ve takrîr-i kelâm edip ben müteveffât-ı mezbûrenin câriye-i memlûkesi olup sıhhatiyle beni mâlından huzûr-ı Müslimînˈde i‘tâk ve tahrîr edip ben hürre olmuş iken hâlâ mezbûre Hindî Hatun beni istirkāk murâd eder suâl olunup kasr-ı yedine tenbîh olunmak matlûbumdur dedikde gıbbeˈs-suâl veˈl-inkâr müdde‘iyye-i mezbûreden da‘vâsına mutâbık beyyine taleb olundukda udûldan el-Hâc İsmail Efendi b. el-Hâc Rıdvan ve el-Hâc Mustafa b. Ahmed nâm kimesneler li-ecliˈş-şehâde hâzırân olup isreˈl-istişhâd fiˈl-vâki‘ müteveffât-ı mezbûre sıhhati hâlinde câriye-i memlûkesi mezbûre Mihricanˈı bizim huzûrumuzda mâlımdan i‘tâk ve tahrîr eyledim deyip ikrâr eyleyip bizi işhâd eyledi ber-vech-i muharrer mevsûfe-i mezkûre sâir harâir-i asliyât gibi hürredir biz bu husûsa şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde gıbbe ri‘âyet-i şerâ’itiˈl-kabûl şehâdetleri makbûle olmak mûcebiyle gıbbeˈl-hükmüˈşer‘î mâ vaka‘a biˈt-taleb ketb olundu. Fiˈl-yevmiˈt-tâsi‘-i aşer min-Muharremiˈl-harâm li-sene hamse ve semânîn ve elf. Şuhûdüˈl-hâl: Mustafa Çelebi b. Ali, Mehmed Çelebi b. Mustafa, Yusuf Bey b. Abdullah, Hasan Beşe b. Yusuf, Ivaz b. Abdullah, İsa Beşe b. Halil ve gayruhum.