Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 652 Hüküm no: 458 Orijinal metin no: [109a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Varislerin, merhum Halil Kapudan’dan intikal eden kalyon satışından olan paylarını Kassam İsmail Efendi’den aldıkları Mahmiye-i Galataˈya tâbi‘ kasaba-i Tophâneˈde Süheyl Bey mahallesinde sâkin iken bundan akdem vefât eden Halil Kapudanˈın verâseti zevce-i metrûkesi Belkıs bt. Abdullah ile vâlidesi Paşa bt. Abdullah nâm hatun ve sulbiye kebîre kızı Hadîce ile sulbiye sagīre kızları Âişe ve Afîfeˈye münhasıra olup kableˈl-kısme mezbûre Paşa Hatun dahi müteveffât olup verâseti sadriye kebîre kızı Hindî Hatun ile oğlu kızları mezbûrân Hadîce ve Afîfe ve Âişeˈye münhasıra olup tashîh-i mes’eleleri bi-hükmiˈl-münâsaha sekiz yüz altmış dört sehimden i‘tibâr olunup sihâm-ı mezkûreden yüz sekiz sehim mezbûretân Belkıs ve Hindî Hatunlardan her birine ve ikişer yüz on altışar sehim mezbûrân Hadîce ve Âişe ve Afîfeˈden her birine isâbet ettiği şer‘an zâhir ve mütekarrer oldukdan sonra sagīretân-ı mezbûretânın tesviye-i umûrları’çün kıbel-i şer‘den mansûbe vasîleri olan mezbûre Belkıs Hatun asâleten ve vesâyeten ve merkūmetân Hindî ve Âişe asâleten meclis-i şer‘-i hatîr-i lâzımüˈt-tevkīrde vasî-i mezbûrenin nâzırı işbu bâ‘isüˈl-kitâb umdetü erbâbüˈt-tahrîr fiˈl-kassâm el-Hâc İsmail Efendi b. el-Hâc Rıdvan mahzarında her biri ikrâr ve takrîr-i kelâm edip müteveffâ-yı mezbûr Halil Kapudan muhallefâtından olup mûmâ-ileyh el-Hâc İsmail Efendi ma‘rifetiyle mukaddemâ cümle vechâsıyla semen-i misline Mustanca Mehmed Kapudanˈa bey‘ olunan kalyon semeni olan bin altı yüz kıt‘a esedî guruşun dokuz yüz guruşundan hisselerimizi merkūme Paşa Hatun sıhhatinde iken her birimiz mûmâ-ileyh el-Hâc İsmail Efendi yedinden istifâ eyleyip hâlâ meblağ-ı bâkī yedi yüz guruşdan dahi hisselerimizi ber-mûceb-i defter-i kassâm merkūm el-Hâc İsmail Efendi yedinden alıp kabz ve istifâdeyi hak eyledik ba‘deˈl-yevm sâlifüˈz-zikr kalyon semeninden ve müteveffât-ı mezbûre Paşa Hatunˈa nisâb iki yüz guruşdan bâkī elli guruşdan mûmâ-ileyh zimmetinde bir akçe ve bir habbe hakkım kalmamışdır dedikde gıbbeˈt-tasdikiˈş-şer‘î mâ vaka‘a biˈt-taleb ketb olundu. Fiˈl-yevmiˈt-tâsi‘-i aşer min-Muharremiˈl-harâm li-sene hamse ve semânîn ve elf. Şuhûdüˈl-hâl: Mehmed Çelebi b. Ali, el-Hâc Mustafa b. Ahmed, Mehmed Çelebi b. Mustafa, Yusuf Bey b. Abdullah, Hasan Beşe b. Abdullah ve gayruhum.