Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 653 Hüküm no: 460 Orijinal metin no: [109a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rabia bt. Mehmed’in küçük oğlu Mehmed’in, annesinden kendisine intikal eden terekeyi satan babası Şaban Halife’den hissesini talep ettiği Mahmiye-i Galataˈya tâbi‘ kasaba-i Kasımpaşaˈda Ebhem Efendi mahallesinde sâkine iken bundan akdem müteveffât olan Râbia bt. Mehmed nâm hatunun verâseti zevci Şa‘bân Halîfe b. Hüseyin ile vâlidesi Havva bt. Abdullah nâm hatuna ve babası mezbûr Mehmedˈe ve sadrî kebîr oğlu Mehmed b. Ali nâm şâbb-ı emrede münhasıra olup tashîh-i mes’eleleri on iki sehimden i‘tibâr olunup sihâm-ı mezkûreden üç sehem mezbûr Şa‘bân Halîfeˈye ve ikişer sehim mezbûrân Mehmed ve Havvaˈdan her birine ve beş sehim merkūm Mehmedˈe isâbet eylediği şer‘an zâhir ve mütekarrer oldukdan sonra işbu bâ‘isüˈl-kitâb mezbûr Mehmed meclis-i şer‘-i hatîr-i lâzımüˈt-tevkīrde merkūm Şa‘bân Halîfe mahzarında üzerine da‘vâ ve takrîr-i kelâm edip vâlidem mezbûrenin hîn-i vefâtında ben sagīr olmağla mezbûr Şa‘bân Halîfe muhallefâtını fuzûlî âhara bey‘ ve semeninden hâsıl olan on iki bin akçeyi kabz eylemişidi hâlen ben âkıl ve bâliğ ve bey‘-ı mezkûru muhîl olup semeninden hissemi ve zimmetinde ma‘kūdun-aleyh olan üç bin akçeden hissemi merkūm Şa‘bân Halîfeˈden taleb ederim suâl olunsun dedikde gıbbeˈs-suâl mezbûr Şa‘bân Halîfe cevâbında mehr-i mersûmdan iki bin akçesini ifrâz ziyâde ile semenlerini kabz eylediğini inkâr edicek müdde‘î-i mezbûrdan da‘vâsına mutâbık beyyine taleb olundukda udûlden Hüseyin b. Ali ve Mustafa b. Hasan nâm kimesneler li-ecliˈş-şehâde hâzırân olup isreˈl-istişhâd fiˈl-vâki‘ mezbûr Şa‘bân Halîfe muhallefât-ı mezkûreyi bizim huzûrumuzda bey‘ ve semenleri bâliğ olduğu on iki bin akçeyi kabz eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde gıbbe ri‘âyet-i şerâ’itiˈl-kabûl şehâdetleri makbûle olmağın mûcebiyle ber-mûceb-i defter müdde‘î-i mezbûrun hissesini kendüye teslîme mezbûr Şa‘bân Halîfeˈye tenbîh birle mâ vaka‘a biˈt-taleb ketb olundu. Fiˈl-yevmiˈl-işrîn mineˈl-Muharremiˈl-harâm li-sene hamse ve semânîn ve elf. Şuhûdüˈl-hâl: es-Seyyid Lütfullah Çelebi b. Emrullah, Ali Efendi b. Ahmed, Abdullah Çelebi b. Ali, Ömer Efendi el-mukayyid, Ali Beşe el-muhzır ve gayruhum.