Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 658 Hüküm no: 465 Orijinal metin no: [109b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mütevvelli Mehmed Bey’in, merhum Mehmed Efendi b. Ali’nin, Kilarcıbaşı Ahmed Efendi Vakfı’na olan borcunu, terekesinden talep ettiği Galata Sarayıˈnda vâki‘ merhûm Kilarcıbaşı Ahmed Efendi Vakfıˈna mütevellî olan bâ‘isüˈl-vesîka Mehmed Bey b. Mustafa meclis-i şer‘-i hatîrde vakf-ı mezbûre mukaddemâ mütevellî iken vefât eden Mehmed Efendi b. Ali Bey verâseti zevce-i metrûkesi Hadîce bt. Abdullah ile kebîr oğlu Abdullah ve sagīr oğlu Abdüllatif Çelebiˈye münhasıra olduğu şer‘an zâhir ve müte‘ayyin oldukdan sonra merkūme Hadîce ile mezbûr Abdullah ve sagīr-i mezbûrun tesviye-i emrine kıbel-i şer‘den mansûb vasî olup tereke-i müteveffâ-yı mezbûre biˈl-vesâyeti vâzi‘uˈl-yed olan Ali Efendi b. İbrahim mahzarlarında biˈt-tevliye üzerlerine da‘vâ ve takrîr-i kelâm edip müteveffâ-yı mezbûrun biˈt-tevliye makbûzu olup mecmû‘-ı mal-ı vakf olan üç yüz on esedî guruşa tevliyeti hasebiyle kabz ve yedinde olduğu alâ-ruûsiˈl-işhâd ikrâr ve işhâd dahi etmekle hâlâ terekesinden meblağ-ı mezbûru biˈt-tevliye verese-i mezkûreden taleb ederim suâl olunsun dedikde gıbbeˈs-suâl veˈl-inkâr mütevellî-i mezbûrdan müdde‘âsına beyyine taleb olundukda udûlden hâlâ kilârcıbaşı olan Ali Ağa b. Hızır ve Câbî Ahmed Çelebi b. Mehmed nâm kimesne li-ecliˈş-şehâde meclis-i şer‘a hâzırân olup isreˈl-istişhâd fiˈl-hakīka müteveffâ-yı mezbûr hayatında mecmû‘-ı mal-ı vakf üç yüz on esedî guruşa hâlâ biˈt-tevliye yedimde makbûzumdur deyü huzûrumuzda ikrâr ve bizi işhâd eyledi isre-ri‘âyet-i şerâyitiˈl-kabûl şehâdetleri makbûle oldukdan sonra mûcebiyle ba‘deˈl-hükm mâ vaka‘a biˈt-taleb ketb olundu. Fiˈs-sâlis veˈl-işrîn min-Muharremiˈl-harâm li-sene hamse ve semânîn ve elf. Şuhûdüˈl-hâl: İbrahim Ağa b. Hızır, Hâfız Ahmed Efendi b. Ramazan, Mehmed Çelebi b. Ali, Ahmed Bey b. İbrahim, Hüseyin Çelebi b. Ali, İsa Beşe b. Ali, İsa Bey b. Halil, Ahmed b. Osman, Veli Çelebi b. Mehmed