Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 340 Hüküm no: 376 Orijinal metin no: [55a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hobyar v. Armiya’nın varislerinden oğlu Avadek’in hisselerini annesi Gonca bt. Arakil’e sattığı Mahrûse-i Galata‘da Bereketzâde mahallesinde sâkin iken bundan akdem hâlik olan Hobyar v. Armiya v. Hobyar’ın verâseti zevce-i metrûkesi Gonca bt. Arakil nâm Ermeniye ile sulbî kebîr oğulları Gabril ve Avadek ve sagīr oğlu Ariton ve sulbiye kebîre kızı Satana ve sagīre kızları Perabiyon ve Maryem’e münhasıra ve tashîh-i meselesi bi-hükmi’l-ferâiz yetmiş iki sehimden olmağla sihâm-ı mezbûreden dokuz sehmi merkūma ve on dört sehmi merkūmûn Gabril ve Avadek ve Ariton’dan her birine ve yedişer sehmi merkūmât Saltana ve Perabyon ve Maryem’den her birine isâbet eylediği lede’ş-şer‘i’l-enver zâhir ve mukarrer oldukdan sonra merkūm Avadek meclis-i şer‘de anası işbu sâhibetü’r-rakīm merkūme Gonca muvâcehesinde ikrâr ve takrîr-i kelâm edip babam hâlik-i merkūmun terekesinden olup mahalle-i mezbûrede vâki‘ bir tarafdan el-Hâc Ahmed veresesi mülkleri ve bir tarafdan es-Seyyid Ahmed nâm kimesne mülkü ve bir tarafdan Kirkor nâm Ermeni mülkü ve ba‘zen Gabril mülkü ve ba‘zen tarîk-i hâs ile mahdûd bir kıt‘a mülk menzil ile Beşiktaş nâhiyesine tâbi‘ Ortaköy’de vâki‘ ma‘lûmü’l-hudûd mülk menzil ve tereke-i sâireden tashîh-i mezbûr üzere ber-mûceb-i defter-i kassâm bana isâbet eden on dört sehm hisse-i irsiyyemi anam merkūme Gonca ahz u kabz ve masârıfına sarfla istihlâk etmeğle ben dahi menzileyn-i mezbûreyn ile tereke-i sâirede ma‘lûm hisse-i şer‘iyyemi anam merkūme Gonca’dan taleb ve da‘vâ sadedinde olmuş idim el-hâletü hâzihî beynimize muslihûn tavassut edip beni da‘vâ-yı mezkûremden anam merkūme Gonca ile dört yüz guruş üzerine inşâ-i akd-i sulh eylediklerinde ben dahi ber-vech-i muharrer sulh-i mezbûru ba‘de’l-kabûl ve bedel-i sulh olan meblağ-ı mezbûr dört yüz guruşu anam mezbûre Gonca yedinden tamâmen ahz u kabz eylediğimden sonra menzileyn-i mezbûreynde ve babam hâlik-i merkūmun kalîl ü kesîr ve celîl ü hakīr tereke-i sâireden olan on dört sehm hisse-i şer‘iyyeme ve târih-i kitâba gelince beynimizde cereyân eden ahz u i‘tâ ve mu‘âmelât-ı şettâya müte‘allika âmme-i de‘âvî ve mutâlebât ve eymân ve muhâsamâtdan anam merkūmenin zimmetini ibrâ-i âm ile ibrâ ve ıskāt eyledim dedikde gıbbe’t-tasdîki’ş-şer‘î mâ hüve’l-vâki bi’l-ibtigā ketb olundu. Fi’l-yevmi’s-sâbi‘ min-Muharremi’l-harâm sene 1138. Şuhûdü’l-hâl: es-Seyyid Ahmed Çelebi, İsmail Çelebi b. el-Hâc Ahmed, Mehmed Efendi el-imâm, Attar Hüseyin Çelebi, Çilingir Yusuf, Nehabet v. Serkis, Kirkor v. Asador, Mikail v. Ariton, Ariton v. Abraham.