Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 346 Hüküm no: 385 Orijinal metin no: [56a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Saliha bt. İbrahim’in Süleyman b. Ramazan’dan muhalaa ile boşandığı Mahrûse-i Galata’da Yolcuzâde mahallesinde sâkine Ümmügülsüm bt. Ahmed nâm sagīrenin anası ve tesviye-i umûruna kıbel-i şer‘den mansûb vasîsi olup zâtı Ali Beşe b. İbrahim ve Mustafa Beşe b. Bayram nâm kimesneler ta‘rîfleriyle mu‘arrefe olan Saliha bt. İbrahim nâm hâtun meclis-i şer‘de dâmâdı işbu râfi‘u’l-vesîka Süleyman b. Ramazan nâm kimesne mahzarında bi’l-vesaye ikrâr ve takrîr-i kelâm edip kızım sagīre-i mezbûrenin zevci mezbûr Süleyman’ın zimmetinde mütekarrır ve ma‘kūdün-aleyh olan yirmi guruş mehr-i mü’eccelimden geçip nafaka-i iddet ve me’ûnet-i süknâsı kendi üzerine olmak üzere dâmâdım mezbûr Süleyman ile bi’l-velâye ve bi’l-vesaye muhâla‘a-i sahîha-i şer‘iyye ile hul‘ olduğumda ol dahi ber-vech-i muharrer hul‘-i mezbûru kabûl eyledikden sonra hukūk-ı zevciyyete müte‘allika âmme-i da‘vâdan her birimiz âharın zimmetini ibrâ ve ıskāt eyledik dedikde gıbbe’t-tasdîki’ş-şer‘î mezbûre Saliha Hâtun yine meclis-i mezkûrda mezbûr Süleyman mahzarında ikrâr ve takrîr-i kelâm edip kızım sagīre-i mezbûre Ümmügülsüm ba‘de’l-bulûğ mehr-i mezkûru olan yirmi guruşu mezbûr Süleyman’dan taleb ve da‘vâ ve ahz u kabz ederse ben meblağ-ı mezbûr yirmi guruşa kefîl ve dāmin oldum dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’s-sâlis min-Saferi’l-hayr sene 1138. Şuhûdü’l-hâl: İsmail Beşe b. Ahmed, İbrahim b. Muharrem, Halil Çelebi b. Mustafa, İbrahim b. Mustafa, Ali b. Ahmed.