Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 349 Hüküm no: 387 Orijinal metin no: [56b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Efendi b. Hasan’ın küçük çocuklarına anneleri Rukiye bt. el-Hâc Ahmed’in vasi tayin edildiği Mahrûse-i Galata’ya tâbi‘ kasaba-i Fındıklı’da Molla Çelebi mahallesinde sâkin iken bundan akdem vefât eden Mustafa Efendi b. Hasan’ın sulbî sagīr oğulları İsmail ve Ahmed ve Mehmed ve Feyzullah’a ve sulbiye sagīre kızları Fâtıma ve Emine’nin tesviye-i emrlerini rü’yete kıbel-i[şer‘den] bir vasî nasbından lâ-büd olup ve sıgār-ı mezbûrenin anaları işbu bâ‘isetü’l-vesîka Rukiye bt. el-Hâc Ahmed nâm hâtun mu‘temede ve müstakīme ve vasiyyet-i mezbûreye her vechile ehil ve müstahıkka olduğu sikāt haberleriyle zâhir olmağın mezbûre Rukiye Hâtun sagīrûn-ı mezbûrûnun tesviye-i emrlerini rü’yete kıbel-i şerî‘at-ı garrâdan vasî nasb ve ta‘yîn olundukda ol dahi ber-vech-i muharrer vasiyet-i mezbûreyi kabûl ve hizmet-i lâzimesini kemâ yenbağī ikāmete ta‘ahhüd etmeğin mâ-hüve’l-vâkı‘ bi’l-ibtigā ketb olundu. Fi’l-yevmi’s-sâmin min-Muharremi’l-harâm sene 1138. Şuhûdü’l-hâl: İmâm Ali Efendi b. Hasan, el-Hâc Ahmed b. Sırrı, Ahmed b. Bekir, Osman b. Hüseyin, Ahmed Efendi b. Süleyman, Süleyman Efendi b. Osman, İbrahim b. Muharrem, Halil Çelebi b. Mustafa.