Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 350 Hüküm no: 388 Orijinal metin no: [57a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Efendi b. Hasan’ın uhdesindeki vakıf menzilin çocukların harcına sarf edilmek üzere vasîleri Rukiye Hatun’a ferağ edildiği Mahrûse-i Galata’ya tâbi‘ Molla Çelebi mahallesinde sâkin iken bundan akdem vefât eden Mustafa Efendi b. Hasan’ın sulbî sagīr oğulları İsmail ve Ahmed ve Mehmed ve Feyzullah ve sulbiye sagīre kızları Fâtıma ve Emine’nin tesviye-i emrlerini rü’yete kıbel-i şer‘den bâ-hüccet-i şer‘iyye mansûbe vasîleri olan anaları işbu bâ‘isetü’l-vesîka Rukiye bt. el-Hâc ( ) nâm hâtun meclis-i şer‘de bi’l-vesaye takrîr-i kelâm edip kasaba-i mezbûrede vâki‘ Çizmeciler Tekyesi Vakfı’ndan icâreteyn-i ma‘lûmeteyn ile müteveffâ-yı mezbûrun taht-ı tasarrufunda olup ba‘de vefâtihî intikāl-i âdî ile evlâd-ı sagīrûn-ı mezbûrûna intikāl eden mahalle-i mezbûrede vâki‘ lede’l-ahâlî ve’l-cîrân ma‘lûmü’l-hudûd ve’l-müştemilât bir bâb vakıf menzilden gayri nesneleri olmayıp ve hâsıl-ı harcına vefâ etmediğinden mâ‘adâ sıgār-ı mezbûrenin el-yevm nafaka ve kisveye şiddet-i ihtiyâcları olmağın menzil-i mezbûr ma‘rifet-i mütevellî ve bedel-i misli ile âhara ferâğ ve bedeli istirbâh ve hâsıl olan nemâsıyla sagīrûn-ı mezbûrûn infâk ve iksâ olunmak haklarında her vechile hayr ve nâfi‘ olmağın ber-vech-i muharrer bâ-izn-i mütevellî ferâğa kıbel-i şer‘den bana izin verilmek bi’l-vesaye murâdımdır dedikde ve hâl minvâl-i meşrûh üzere olduğunu zeyl-i vesîkada muharrerü’l-esâmî Müslimîn dahi ihbâr etmeleriyle hâkim-i muvakkı‘-ı sadr-ı kitâb tûbâ-lehû ve hüsnü-meâb hazretleri dahi menzil-i mezkûru bedel-i misli ve izn-i mütevellî ile ferâğa vasiyye-i mezbûre Rukiye Hâtun’a izin verilmeğin mâ-hüve’l-vâkı‘ bi’l-ibtigā ketb olundu. Fi’l-yevmi’s-sâmin min-Saferi’l-hayr sene 1138. Şuhûdü’l-hâl: İmâm Ali Efendi b. Hasan, Molla Ahmed b. Bekir, el-Hâc Ahmed b. Piri, Osman Çelebi b. Hasan, Ahmed Efendi b. Süleyman, Süleyman Efendi b. Osman, İbrahim Çelebi b. Muharrem, Halil Çelebi b. Mustafa, Yahya Efendi b. Yusuf, Mehmed b. Ahmed.